सरकार तिमी दशैँ मनाऊ, म त हिँडेँ परदेश

असोज ३०, २०८० मंगलबार १७:५७:३५ | उज्यालो सहकर्मी

महन्थ कुमार कापर/सिराहा ।

उमेरले अहिले २६ वर्ष लागेँ । तर परदेश बस्न थालेको करिब ७ वर्ष हुन लाग्यो । बाध्यताले गर्दा १९ वर्षको उमेर मै मलेसिया जानु पर्‍यो । त्यहाँ ६ वर्ष काम गरेर फर्किएको ८ महिना मात्रै हुँदै छ । तर म यो देशमा टिक्न सकिंन । त्यसैले फेरि जाँदै छु खाडीको देश यूएई ।

बुवा आमा सोझा छन् । सम्पत्ति पनि छैन । घरको चुलो परदेश नगई बल्दैन । अझ हामी तराईको मान्छेलाई त बहिनीको बिहे गर्नु पर्ने अर्को ठुलो जिम्मेवारी हुन्छ । मेरो काँधमा पनि दुई बहिनीको बिहेको जिम्मेवारी छ । त्यसैले पनि परदेश जानु परेको छ ।

यो केही समय देशमा बिताउँदा थुप्रै कुराको अनुभव भयो । मलेसियामा ३५ हजार कमाउन जति दुःख गर्न पर्छ नि यहाँ त १० हजार कमाउन पनि त्यसको दोब्बर दुःख गर्न पर्ने रहेछ ।

जति गर्न खोज्दा पनि घरको चुलो बल्नै गाह्रो भएपछि हामीलाई परदेश लाग्नै पर्छ । तर अहिले यो चाडबाडको बेलामा परदेश हिँड्न पर्दा मन भारी भएको छ ।

परिवारसँगै दशैँ नमनाएको पनि धेरै वर्ष भइसक्यो । यो पालि चाहिँ सँगै मनाउन पाइन्छ कि भन्ने लागेको थियो । तर यसपालि पनि यस्तै हुने भयो ।

हाम्रो पनि गाउँघरमा दशैँ धूमधामसँग मनाइन्छ । मेला लाग्छ । दुर्गा पूजा गरिन्छ । तर हामी गरिब दुःखीलाई कहाँ यस्तो भाग्य मिल्ने रहेछ र । भाग्यमै थिएन सायद भनेर चित्त बुझाएको छु ।

दुःख त घरमा पनि लाग्यो होला । तर बाध्यताको अघिल्तिर भावना कमजोर बन्ने रहेछ । आमाको मन कति दुखेको होला । चाडबाडको बेलामा छोरो परदेश हिँड्यो भन्ने त उहाँलाई पनि लागेको होला । तर भन्न सक्नुहुन्न । तर यो रहर होइन बाध्यता हो ।

हाम्रो तराईमा त सबैको अवस्था नै खराब छ । विदेश नगई त घरको चुलो बल्न पनि गाह्रो छ ।

कम्तीमा पनि सरकारले हामीजस्तो मजदुरी गर्नेलाई महिनाको २० हजार रुपैयाँ मात्र कमाइ हुने वातावरण मात्र बनाइदिए पनि सायद यसरी परदेश हिँड्न पर्दैन थियो कि ।

महिनामा २० हजार रुपैयाँ मात्र कमाइ भयो भने त हामी पनि खुसी खुसी आफ्नै देशमा बस्न पाउने थियौँ नि । सरकारले यति वातावरण बनाइदिए त यस्तो भारी मन लिएर विदेश हिँड्न पर्दैन थियो ।

तर म सरकारलाई भन्न चाहन्छु तपाईँहरू हामीले पठाएको रेमिट्यान्सले खुसीयाली मनाइरहनुभएको छ । रमाइरहनुभएको छ । तर युवाहरूलाई यस्तो बाध्यता बनाइदिनुभएको छ त्यो उचित छैन ।

तपाईँहरू ठुलो ठुलो महलमा टीका जमरा लगाएर विजया दशमी मनाउनुहोस् । म त परदेश हिँडेँ । अब अर्को महिना रेमिट्यान्स पठाउँछु ।

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्