संसद बैठकको पहिलो दृश्य - रवि र ज्ञानेन्द्र छक्क, अरु अक्क न बक्क !

 मंसिर ११, २०७९ आइतबार १३:३४:८ | मिलन तिमिल्सिना
unn.prixa.net

केटाकेटी पहिलो दिन स्कुल पुगेझैं घण्टीवाला सांसदहरु संसदको घण्टी बज्न एक घण्टा अघि नै संसद भवन छिरे । आफूहरुको लागि छुट्याएर बसेको कुर्सीमा फूर्तिका साथ बसे । जुम्लाबाट गलाभरि माला भिरेर आइपुगेका ज्ञानेन्द्र शाही हस्याफस्याङ गर्दै भित्र छिरे । अनि शालिनताका साथ सप्तरीबाट आइपुगे सिके राउत । कैलालीबाट चुनाव जितेका रेशम चौधरीको पार्टीका नयाँ अनुहारहरु यताउता पल्याकपुलक हेर्दै भित्र छिरे । अनलाईन र फेसबुकमा देखेका अनुहार आँखै अघि देखेपछि एक–अर्कातिर फर्किएर मुस्कुराए । 

त्यसपछि आइपुगे माधव नेपाल र प्रचण्ड । जता फर्के पनि अर्कै पार्टीका मान्छे । आफ्नातिरका मान्छे निकै कम । अलि धेरै ल्याउन पाइन्छ कि भनेर देउवाको रुख समाएको, तर रुखले आफूहरुलाई छहारी मात्र दियो, हरियाली अरुलाई नै दियो । आफ्नाहरु कम भएपछि नेपाल र दाहालको अनुहार उदास भयो । दुवै उदास अनुहार कुनातिरको कुर्सीमा गएर बसे ।

अनि टोपी मिलाउँदै, हात जोड्दै, जुंगा नभएको मुखमा ताउ लगाउँदै भित्र छिरे शेरबहादुर देउवा । नयाँ अनुहारलाई पल्याकफुलुक हेरे, अनि सिधै प्रचण्ड र नेपाल बसेको कुनातिर पुगेर हात जोडे । प्रचण्ड र नेपालले पनि हात जोडे तर मुख अर्कैतिर फर्काए । देउवा मुस्कुराउँदै आफ्नो कुर्सीमा पुगे ।

सबैजना आ-आफ्ना सीटमा बसेपछि दाहिने हात तथास्तु मुद्रामा उचालेर अन्तिममा संसद छिरे केपी ओली । अनुहार प्रचण्ड र नेपालको जस्तै फिक्का उदास भए पनि बनावटी चमकसहित नयाँ अनुहार भएकाहरुतिर गए । उनलाई आँखै अगाडि देखेपछि नयाँ र युवा सांसदले बाउ र हजुरबाउलाई गर्ने मान सम्झेर नमस्ते गरे । नमस्ते खाएर ओली गमक्क परे ।

अनि मुखमा गम्भीरता धारण गरेर उही उखाने शैली निकालेर मसिनो स्वरमा भने ‘लौ यो संसदमा पनि केटाकेटी र लैनापाडा देख्छु त । अस्तिसम्म हामीले फुटबल खेल्दा मैदानबाहिर मोजाको भकुण्डो गुडाउँदै गरेका तपाईंहरु अहिले हामीसँगै मैदानभित्र आउनु भएछ । हैन तपाईंहरु आ-आफ्नो काम छाडेर किन आएको हँ ? अचम्म लाग्छ बा ।’

ओलीको बोली सुन्नेबित्तिके उताबाट देउवाले थपे, ‘हामीले के के न खाए भनेर डाह लागेर आएका होलान् नि । हेरौंला नि के के खाँदा हुन् ।’ 

‘जाँच दिन आएको । लाज पचेका नकचराहरूलाई टुंडिखेलमा राखेर एक एक किक हान्न मन छ, त्यो पनि उडी उडी नाकको डाँडी भाँचिने गरी’ रवि लामिछाने कड्किए ।

‘अनि उतै टुंडिखेल पो जानुपर्छ त, के खान संसद छिरेको ?’ ओलीले जवाफ फर्काए ।

‘टुंडिखेलमा तपाईंहरु भेटिनु पनि पर्यो नि । त्यसैले खोज्दै यहाँ आएको नि’ रविको छेउतिर बसेकी डाक्टर बोलिन् ।

‘ए तिमी त अलि वर्ष पहिले मलाई साझा सवालमा हायलकायल पार्ने नानी होइनौ ? उसैगरी हायलकायल बनाउने सागर भन्ने ठिटो सुई बोकेर निहुँ खोज्दै डडेलधुरा पुगेको थियो । धन्नै घोचेको थिएन सुईले’ देउवाले पछिल्तिर सुम्सुमाए ।

‘झाँक्री आउने ठाउँमा डाक्टर आइन्, ठिकै त भयो नि’ ओली बोले ।

‘हैन ओलीजी के को डाक्टर र झाँक्रीको कुरा गर्नुहुन्छ ? एमालेको कति सीट आउँछ भन्नुभएको थियो रे ? मिल्यो ? चुनावअघि बोलेको फुटेज सुनाउँ ?’ प्रचण्ड उठेर आए ।

‘ए लामिछाने भाइ, तिम्रो नाम के रे ?’ प्रचण्डको कुरा सुनेर ओली रवितिर फर्किए ।

‘थाहा छँदैछ नि तपाईंलाई रवि भन्ने ।’

‘अनि रवि भनेको के हो ? सूर्य । सूर्य कसको चुनाव चिन्ह ? एमालेको । रवितिरका सबै भाइबहिनी हाम्रै भए । अनि उ त्यहाँ कुनातिर मुख फर्काएर बसेका माधवजीहरु हामी पनि पहिले त सूर्य कै भन्नुहुन्छ, तपाईं पनि सूर्य ! माधवजीले त बिर्सेर सूर्यमै भोट हाले रे भन्ने पनि सुनेको हो । खैर माधवजीहरुलाई पनि सूर्य कै माने भयो । अनि लिङ्देनजीहरुलाई एमालेले नै जिताएको हो । उ सिके राउतलाई मूलधारमा ल्याएको मैले नै हो । मेरै कारण उहाँ यहाँसम्म आइपुग्नुभयो । उहाँहरु पनि हाम्रै मान्छे । अनि सबै जोड्दा पुगेन त हिसाब ?’ ओलीले १० ठाउँमा केरमेट गरेको जोडघटाउको हिसाब भएको कागज देखाए ।

‘हामीलाई अपमान भयो, मान पुगेन । तिम्रो एक्स, अनि हाम्रो एस पार्टीलाई आफ्नो भन्न लाज लाग्दैन ?’ माधव नेपाल कड्किए ।

‘अपमान त कसले गर्यो होला ? देउवाजी भन्दिनुस् त ?’ ओली देउवातिर फर्किए ।

‘क..कसले अपमान गर्यो ? ए बाबा माधवजीहरुलाई कसले जिताएको ? समानुपातिकको मत हेर्नुस् त । यति मान्छे पनि हामीले ल्याइदिएको हो । कुरा गर्नुहुन्छ’ देउवा झोंक्किए ।

देउवाको कुरा सुनेपछि माधव नेपालले प्रचण्डतिर हेरे र कुनातिर फर्केर चुपचाप बसे ।

‘हैन यहाँ काम पनि गर्ने हो कुरा मात्रै हुन्छ हँ ? दलालहरु, चोरहरु, आतंककारीहरु, सबैको गलामा दाम्लो लगाएर झुण्ड्याउन आएको हुँ म’ अघिसम्म चुपचाप बसेका ज्ञानेन्द्र शाही एक्कासि कड्किए ।

‘दलाल, भ्रष्टाचारीहरुलाई त झुण्ड्याउने होइन, उडी उडी नाकको डाँडी भाँचिने गरी हान्ने हो । त्यो पनि मैले, अरुले छुन पाउँदैन’ रविले झनै ठूलो स्वरमा बोले ।

‘तिम्रो मात्रै ठूलो स्वर ? तिम्रा पछिल्तिर मात्रै मान्छे छन् ? हाम्रा देखेनौ ? तिमीले हैन मैले गर्ने हो यी सबै काम ?’ शाहीले औंला ठड्याए ।

‘तिम्रा धेरै कि मेरा धेरै मान्छे ? तिम्रो स्वर राम्रो कि मेरो ? तिमीले टेलिभिजनमा कहिल्यै बोलेका छौ ?’ रविले सातो लिए ।

‘ए भाइ हो तिमीहरु मात्रै छौ यहाँ ? हामीलाई देखेनौं ? नासाको वैज्ञानिक हुँ । बनाउने काम मैले गर्छु ।  टुक्र्याउन परे पनि मै टुक्र्याउँछु । पहिले मधेश टुक्र्याउनुपर्छ भनेर हिँडेको मान्छे हो ? चिनेका होलाउ नि ?’ सीके राउत कड्किए ।

‘सीकेजी धेरै नकड्किउँ । अरु साथीहरु पनि उम्लिन आवश्यक छैन । हामीलाई पनि पहिले यहाँ आएपछि के के न गरौंलाजस्तो लाग्थ्यो । मने २०६४ सालमा हामी कत्रा थियौं, तपैंहरुलाई थाहा छँदैछ । के के न गर्छु भनेर यहाँ आएको, यी अहिले सानो भएर खुम्चिनुपरेको छ । तपैंहरुको हालत पनि हुने त्यही हो । नआउनुपर्ने आइहाल्नुभयो, हामीलाई समेत खुम्च्याउनुभयो । बरु मिलेर सरकार बनाउँ, बाँडीचुँडी खाउँ’ प्रचण्डले भने ।

‘सरकार बनाउने रे कसको नेतृत्वमा ?’ सरकारको कुरा सुन्नेबित्तिकै देउवाले कान ठाडो पारे ।

‘मेरो नेतृत्वमा । सुन्नुभएन चुनावताका मैले भाषण गरेको ?’ गगन आइपुगे ।

‘हैन हैन, प्रधानमन्त्री हुने पालो त मेरो हो’ गगनको पछिपछि आएका रामचन्द्र पौडेल, प्रकाशमान सिंह, शेखर कोइराला, शशांक कोइरालाले हानथाप गरे । 

‘नाम सुब्बिनी, कसरी उभ्भिनी भनेजस्तो । चाइनेजो नाम मात्रै कांग्रेस भएर के गर्नु, चार–पाँचवटा ढोंड टेकेर हिँड्नुपर्या छ । त्यहाँमाथि प्रधानमन्त्री बन्न लर्को । खान मात्रै जानेकाहरु । जनताको त डर मानेनौ मानेनौ, यहाँ आइपुगेका यी नयाँ साथीहरुको त लाज मान्नु नि’ चित्रबहादुर केसीले तीतो पोखे ।

‘हो नि चित्रबहादुरजीले त खानै जानुहुन्न । अब सभामुख चयन नहुँदासम्म ज्येष्ठ सदस्यको हैसियतले तपाईंले नि अध्यक्षता गर्नुपर्ने होला । कि त्यो पनि खानुहुन्न ?’ ओलीले चित्रबहादुरतिर हेरे ।

‘त्यो त किन नखानु, मुखमै आएको कुरा पनि कसैले खान्न भन्छ ?’ चित्रबहादुरले सभामुखको कुर्सीतिर हेरेर मुख मिठ्याए ।

‘सबैभन्दा जेठोले नै अध्यक्षता गर्नुपर्छ भन्ने के छ ? अलिकति क्रमभंग गरौं न । सबैभन्दा कान्छा सदस्यले गरौं, हाम्रोमा हुनुहुन्छ’ रविले सोवितालाई देखाए ।

‘रविजी मने यस्तो क्रमभंग हामीले धेरै गर्न खोजेको हो, हुँदो रहेनछ । त्यसैले जेजे चल्दै आएको छ, त्यसै गरौं । जनताका कुरा पनि गरौं । मिलेर बाँडीचुँडी पनि खाऔं । यसमै हाम्रो हित हुन्छ’ प्रचण्डले भने ।

‘हैन त्यसरी त हुँदै हुन्न, अब तिमीहरुले गर्दै आएको यहाँ केही पनि चल्दैन । नयाँ तरिकाले हुन्छ’ ज्ञानेन्द्र शाही कड्किए ।

‘त्यस्तो नयाँ शैलीमा काम गर्न सक्ने क्षमता मसँग मात्रै छ’ सीके राउतले नाक फुलाए ।

‘नयाँ ढंगले त हामीले गर्न सक्छौं, जनताले हामीलाई नै धेरै पत्याए । त्यसैले अरु चुप लागेर बस, हामी गर्छौं काम’ रवि जुरुक्क उठे ।

‘तपाईंहरुले सक्नुहुन्न क्या, फेरि हामी ट्राइ गर्छौं’ प्रचण्डले भने ।

‘बोलेर मात्रै हुन्छ ? बोलेर मात्रै हुने भए ओलीजी र प्रचण्डजीले उहिल्यै गरिसक्थे । नबोलेर पनि काम गर्ने भनेको मैले मात्रै हो । तिमीहरु बढ्ता नबोल’ देउवा झोंक्किए ।

सबैको कुरा सुनेपछि ओलीले सूर्य थापातिर फर्किएर भने, ‘ती भ्यालु कि भेलु के नामका बाजे रे..? तिनी पनि संसदमा आए भने त झन् रमाइलो पो हुन्थ्यो क्यारे । दुई हजारमा मान्छन् भन्या होइन ? बोलाउने त एकपटक ?!’

अन्तिम अपडेट: मंसिर १३, २०८१

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

मिलन तिमिल्सिना

दुई दशकदेखि रेडियो र अनलाइन पत्रकारितामा संलग्न मिलन तिमिल्सिना समसामयिक विषयमा विश्लेषण र व्यंग्यमा दखल राख्नुहुन्छ। 

3 Comments

  • surya shuvachintak

    Dec. 7, 2022, 3:52 p.m.

    गज्जब । हजुरका व्यङ्ग्यतात्मक लेखको म नियमित पाठक ।

  •  0 Reply

  • श्रीप्रसाद घिमिरे

    Nov. 28, 2022, 2:52 p.m.

    परिकल्पनाकारलाइ सलाम छ! साँच्चै नै यस्तै भयो भने त सरकार गठन गर्न र काम गर्न पनि सजिलो छैन!

  •  0 Reply

  • जेपी बगाले

    Nov. 28, 2022, 12:06 a.m.

    हाहाहाहाहा

  •  1 Reply

तपाईको प्रतिक्रिया

समाचार

लोकप्रिय

१

अस्थायी, ज्यालादारी कर्मचारीलाई पनि सामाजिक सुरक्षा काेषको दायरामा ल्याउने प्रधानमन्त्रीकाे घाेषणा

२

पर्थमा लज्जास्पद हारपछि पनि अस्ट्रेलियाले दोस्रो टेस्टमा उही टोलीलाई खेलाउने

३

पाकिस्तानमा पूर्वप्रधानमन्त्री खानको रिहाइ माग गर्दै हजारौंको जुलुस राजधानी इस्लामाबाद पुग्यो

४

पाकिस्तानले जिम्बावेलाई १० विकेटले हरायाे

विचार

उज्यालो टी भी

वैदेशिक रोजगारीमा जादा सुरक्षित हुने तरिका

मनोपरामर्शले बदलेको जीवन कथा

विदेशबाट श्रीमान् फर्काउने साहस बटुलेका वित्तीय कक्षा सहभागीका कथा

मेरो कथा मेरो भोगाई