काठमाण्डौका कुनै पनि क्षेत्रमा आज मतगणना नहुने, आयोगको नयाँ निर्देशनले समस्या

मंसिर ४, २०७९ आइतबार २३:८:३८ | अर्जुन पोख्रेल

काठमाण्डौ – काठमाण्डौ जिल्लाका १० वटा निर्वाचन क्षेत्रमध्ये आज कुनै पनि क्षेत्रको मतगणना सुरु नहुने भएको छ । यसअघि प्रमुख निर्वाचन आयुक्त दिनेशकुमार थपलियाले काठमाण्डौसहित सुगम ठाउँको मतगणना आजै सुरु हुने दाबी गर्नुभएको थियो । उहाँले ८ गतेभित्र प्रत्यक्षतर्फका सबै मतगणना सम्पन्न गरेर परिणाम सार्वजनिक गर्ने पनि बताउनुभएको छ ।

तर संघीय राजधानी काठमाण्डौका १० वटै क्षेत्रमा आज मतगणना नहुने पक्का भएको छ । काठमाण्डौका केही निर्वाचन क्षेत्रमा अझै सबै मतपत्र निर्वाचन अधिकृतले बुझिसकेका छैनन् । काठमाण्डौको क्षेत्र नम्बर एकदेखि १० सम्मका सबै निर्वाचन अधिकृतसँग उज्यालो अनलाइनले कुराकानी गर्दा सबैले आज मतगणना सुरु नहुने जानकारी दिएका छन् ।

अहिलेसम्म कुनै पनि निर्वाचन अधिकृतले मतदान अधिकृतबाट सबै मतपेटिका बुझिसकेका छैनन । पहिले निर्वाचन अधिकृतले मतपेटिका बुझ्नुपर्नेछ । त्यसपछि सबै दलका प्रतिनिधि राखेर मतगणनाको प्रक्रियामा सहमति जुटाउनुपर्छ अनि मात्रै मतगणना सुरु हुन्छ । यो प्रक्रिया पूरा गर्न आज नभ्याइने निर्वाचन अधिकृतले उज्यालोलाई बताएका छन् ।

क्षेत्र नम्बर एकका निर्वाचन अधिकृत राजुकुमार खतिवडाले अहिलेसम्म मतपेटिका बुझि नसकेको बताउनुभयो । ‘एकैछिनमा मतपेटिका बुझिन्छ, अनि सर्वदलीय बैठक बस्नुपर्छ त्यसपछि मात्रै आज गणना हुने÷नहुने टुंगो लाग्नेछ’, खतिवडाले भन्नुभयो ।

निर्वाचन आयोगले अन्तिम समयमा दिएको निर्देशनले समस्या

निर्वाचन आयोगले आइतबार बेलुका दिएको नयाँ निर्देशनले गर्दा समस्या भएको निर्वाचन अधिकृतले गुनासो गरेका छन् । यसअघि पहिले प्रत्यक्षतर्फको मतगणना गरिसकेपछि मात्रै समानुपातिकतर्फको मतगणना गर्ने निर्णय भएको थियो । निर्वाचन अधिकृतहरुले त्यसै अनुसार व्यवस्थापन गरेका थिए । तर निर्वाचन आयोगले सोमबार साँझ निर्देशन जारी गर्दै समानुपातिकतर्फको मतगणना पनि सँगै गर्नुपर्ने जनाएको छ । यसले गर्दा मतगणना स्थलको पुनः व्यवस्थापन गर्नुपर्ने देखिएको छ । किनकी ४ वटा मतपत्रको एकैपटक गणना सुरु गर्नुपर्नेछ ।

क्षेत्र नम्बर ३ की मतदान अधिकृत मन्दिरा शाहीले भन्नुभयो, ‘हामीले पहिले एक खालको व्यवस्थापनको योजना र तयारी गरेका थियौँ अब सबै काम फरक ढंगले गर्नुपर्ने भयो, दलका प्रतिनिधि बस्ने ठाउँदेखि मत गन्ने मान्छेसमेत थप्नुपर्ने भयो, गणना सुरु गर्न आज सम्भव छैन ।’

काठमाण्डौ क्षेत्र नम्बर ७ की निर्वाचन अधिकृत उषा श्रेष्ठले पनि आयोगको पछिल्लो निर्णयले समस्या र अन्योल बढाएको गुनासो गर्नुभयो । ‘हामीलाई प्रत्यक्ष र समानुपातिकतर्फको मतगणना एकैपटक गर्नु भन्ने निर्देशनले काम थपेको छ, हामीले तयारी गरेको भन्दा फरक तरिकाले मत गन्नुपर्ने भयो, त्यसैले आज सम्भव छैन’, उहाँले भन्नुभयो ।

यस्तै, काठमाण्डौ क्षेत्र नम्बर ८ का निर्वाचन अधिकृत दीपक धितालले पनि मतपेटिका बुझ्ने काम भइरहेको र सकभर आज राति नै दलका प्रतिनिधि राखेर छलफल गर्ने तयारी भइरहेको जानकारी दिनुभयो । तर आजै मतगणना सुरु गर्ने सम्भावना नरहेको उहाँको भनाइ छ ।

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

अर्जुन पोख्रेल

उज्यालोमा कार्यरत अर्जुन पोख्रेल आर्थिक विषयमा कलम चलाउनु हुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

काठमाण्डौका कुनै पनि क्षेत्रमा आज मतगणना नहुने, आयोगको नयाँ निर्देशनले समस्या

फाइल फाेटाे

निर्वाचन आयोगले अन्तिम समयमा दिएको निर्देशनले समस्या

तपाईको प्रतिक्रिया