मलेसियामा अन्तिम रुप दिँइदै श्रम सम्झौताको मस्यौदा

असोज १०, २०७५ बुधबार १४:२३:४७ | रीतु थेबे

काठमाडौं – उच्चस्तरीय छलफलबाट श्रम सम्झौताको मस्यौदालाई अन्तिम रुप दिन नेपाली प्रतिनिधि मण्डल बुधबार मलेसिया प्रस्थान गरेको छ । असोज १२ मा हुने छलफलबाट दुई पक्षीय श्रम मस्यौदालाई अन्तिम रुप दिइने छ ।

छलफलबाटै सम्झौतामा हस्ताक्षर गर्ने मिति तय गरिने श्रम, रोजगार तथा सामाजिक सुरक्षा मन्त्रालयले जनाएको छ । सम्झौतामा हस्ताक्षर गर्न मलेसियाका मानव संसाधन मन्त्री एम कुलसेगरन नेपाल आउनु हुने छ । नेपालका तर्फबाट श्रममन्त्री गोकर्ण विष्टले हस्ताक्षर गर्नुहुनेछ ।

मलेसियासँग एमओयु गर्न तीन पटक मस्यौदाको ड्राफ्ट आदानप्रदान गरिएको थियो । दुई पक्षबिच पटक पटक भएको छलफलबाट मस्यौदा संसोधन र सहमति जुटाउँदै यसपटक अन्तिम रुप दिन लागिएको हो ।

नेपाली कामदार मलेसियामा रोजगारी गर्न जान थालेको १७ वर्षपछि पहिलो पटक श्रम सम्झौता हुन लागेको हो । श्रम सम्झौता हुन नसक्दा गन्तव्य देश मलेसिया नेपाली कामदारलाई अप्ठेरो पर्दा पन्छिँदै आएको थियो ।

मलेसियामा हुने छलफलमा नेपालका तर्फबाट श्रम मन्त्रालयका सहसचिव कृष्णप्रसाद ज्ञवालीको संयोजकत्वमा सहसचिवहरुको तीन सदस्यीय टोली हुनेछ । टोलीमा परराष्ट्र मन्त्रालयको दक्षिणपूर्व एसिया महाशाखा हेर्ने सहसचिव तापस अधिकारी र कानून मन्त्रालयका सहसचिव कविन्द्र गौतम रहनु भएको छ ।

मस्यौदामा नेपाली कामदारको सामाजिक सुरक्षाका विषयमा जोड दिइएको छ । सम्झौतामा २४ घण्टे बीमा र कामदार भर्ती गर्दाको खर्च खर्च रोजगारदाताले व्यहोर्नुपर्ने लगायत रहनेछन् ।

अब सम्झौता भएपछि मलेसिया र नेपाल सरकार कामदार प्रति जिम्मेवार बन्नेछन् । मलेसिया नेपाली कामदारको मुख्य गन्तव्य देश हो । मलेसियाको गृह मन्त्रालयले राखेको रेकर्ड अनुसार झण्डै दुई लाख नेपाली त्यहाँ वैधानिक रुपमा कार्यरत छन् ।

श्रममन्त्री विष्टले मलेसिया जाने कामदारमाथि आर्थिक भार भएको भन्दै त्यहाँ जान रोक लगाएर मलेसियासँग सम्झौताका लागि पहल गर्नुभएको थियो । त्यसै कारण गएको जेठ २ गतेदेखि नेपाली कामदार मलेसिया जान पाएका छैनन् । मलेसिया सरकारसँग मिलेर स्थापना गरिएको भिएलएन, जिएससी, वान स्टेप सेन्टर लगायतले कामदारबाट १९ हजार भन्दा धेरै अतिरिक्त शुल्क लिने गरेका थिए ।

अन्तिम अपडेट: मंसिर १०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।