कस्तो छ बजारमा भाइमसलाको भाउ ?

कात्तिक १३, २०७८ शनिबार १२:३१:३५ | वैद्यनाथ पाैडेल

काठमाण्डाै – तिहारमा चाहिने भाइमसलाको कारोबार सुरु हुन थालेको छ । काठमाण्डौको असन लगायतका बजारमा भाइमसलाका आकर्षक प्याकेटहरु सजाइएका छन् । असनमा भाइ मसला बेच्दै गर्नुभएका योगेश्वर मुल्मीको पसलमा १ सय रुपैयाँदेखि १२ सयसम्मका भाइमसलाका प्याकेट छन् ।

पोहोर ५०/६० रुपैयाँमा बेचेको प्याकेटको अहिले १ सय देखि १ सय १० रुपैयाँसम्म पर्ने गरेको उहाँले बताउनु भयो । उहाँका अनुसार पोहोरको भन्दा ४०/५० रुपैयाँ बढेकाे छ। तर आफूले प्याकेट मात्रै बेच्ने गरेका कारणले कुन मसलामा कति भाउ बढेको छ भन्ने थाहा नहुने उहाँले बताउनुभयो ।

‘हामीलाई प्याकेटमा ल्याएर दिन्छन् त्यही बेच्ने हो भाउका बारेमा हामीलाई थाहा हुन्न,’ उहाँ भन्नुहुन्छ, ‘बजारमा मान्छेको भिडभाड भए पनि खासै व्यापार छैन । अबका केही दिनमा भने बढ्ला ।’

अर्का व्यापारी राजेश जयसवालले भने अघिल्लो वर्षको तुलनामा केही भाउ बढेको बताउनु भयो । उहाँ भन्नुहुन्छ, ‘काजु अघिल्लो वर्ष १४ सय रुपैयाँ थियो अहिले १४ सय ५० देखि १५ सय रुपैयाँसम्म पर्छ । पेस्ता १८ सयमा खासै नबढेको तथा बदाम भने १२ सय भएकोमा अहिले बढेर १३ सय यस्तै छ ।’

अघिल्लो वर्ष करिब ३ सय प्याकेट बेच्नु भएका उहाँ अहिले भने सडकमा मान्छेको भिडभाड भए पनि त्यति बिक्री नभएको र अबको १/२ दिनमा भने धेरै बिक्री हुने बताउनु हुन्छ । उहाँको पसलमा भने प्याकेटको २ सय रुपैयाँदेखि माथिका मसला छन् । अघिल्लो वर्ष यही मसला १ सय पचास रूपैयाँसम्मका बेचेको उहाँ सम्झिनुहुन्छ ।

‘भाउमा खासै फरक छैन,’ छेउमै राखेकाे भाइमसलातर्फ इसारा गर्दैै भन्नुभयाे ‘ग्राहकले भाउ बढ्यो भन्छन् भनेर मसलाको भाउ बढाउने भन्दा पनि मसला घटाउने गरेका छन् व्यापारीले ।’

पहिले १ सय रुपैयाँको प्याकेट मसलामा ४/४ वटा काजु र पेस्ता हुने गरेकोमा अहिले भने ३/३ वटा मात्रै राख्ने गरेको उहाँले बताउनु भयो ।

व्यापारी माधवी गुप्ता भने प्याकेटमा ५/१० रुपैयाँ मात्र बढेको बताउनु हुन्छ । त्यसकारण भाउ बढेको भन्न नमिल्ने उहाँको तर्क छ ।

‘यसको भाउ भने हामीले भन्दा पनि बनाउने मानिसमा भर पर्छ,’ उहाँले भन्नुभयो, ‘कम मूल्यमा बेच्नु छ भने कम मसला र चकलेट राख्छन् । बढीमा बेच्ने मसलामा चकलेट पनि राम्रो र मसला पनि धेरै हुन्छ ।’

नेपाल खुद्रा व्यापार संघका महासचिव तथा असनमा मसलाको व्यापार गर्दै आउनु भएका अमुलकाजी तुलाधर भने मसलाको भाउ नबढेको भन्नुहुन्छ ।

उहाँकाे तर्क छ, ‘कर्नाटकमा ठूलो पानी परेका कारण छोकडामा केही भाउ बढेको छ, अरुमा खासै छैन ।’

नेपाल खाद्य तथा किराना व्यवसायी संघका अध्यक्ष तथा नेपाल चेम्बर अफ कमर्सका सदस्य देवेन्द्र भक्त श्रेष्ठले चीनबाट आउने सामान १/२ कन्टेनर मात्र छोडेको हुनाले पनि छोकडा तथा नरिवल जस्ता केही मसलमा भाउ बढेको र अरुमा नबढेको दावी गर्नुभयो ।

भाइ मसलामा विशेष गरी काजु, पेस्ता, बदाम, मखना, नरिवल, छोकडा, ल्वाङ, सुकुमेल, अलैंची, दालचिनी, किसमिस, अञ्जीर, ओखर, मिश्री, खुर्पानी, सुपारी गरी १६ थरिका मसला पर्छन् । चकलेट र अन्य मिठाइका सामग्री पनि समावेश गरी आकर्षक प्याकेट बनाउने गरिन्छ ।

अन्तिम अपडेट: मंसिर ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

वैद्यनाथ पाैडेल

वैद्यनाथ पाैडेल उज्यालाे सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्