ट्राफिक व्यवस्थापनका लागि सीताराम हाछेथुका १० सुझाव

पुष ११, २०७६ शुक्रबार ९:१६:४ | उज्यालो सहकर्मी

दिनहुँजसो गाडी दुर्घटनाको खबरले सबैलाई चिन्ता बढाएको छ । साँघुरा सडक, पैदल यात्रुमा चेतनाको कमी, सवारी चालकको लापरबाहीसँगै सुरक्षित सडकका लागि आवश्यक पूर्वाधारको अभावले ट्राफिक व्यवस्थापन चुनौती बन्दै गएको छ । यातायातको क्षेत्रमा भएको विकाससँगै नयाँ–नयाँ चुनौती र जटिलता थपिँदै गएका छन् ।

समग्र यातायातको अवस्था र यात्रुले प्राप्त गरिरहेको यातायात सेवा सन्तोषजनक छैन । यातायात सेवा गुणस्तरीय, व्यवस्थित र यात्रुमैत्री हुन नसक्दा दैनिकजसो गाडी दुर्घटना भइ मानवीय र भौतिक क्षति हुने क्रम बढ्दो छ ।

पछिल्लो समय काठमाण्डौको ट्राफिक व्यवस्थापनका लागि केही सकारात्मक प्रयास भैरहेका छन् । तर यातायात सेवा गुणस्तरीय हुन अझ धेरै सुधार गर्न बाँकी छ । पूर्व ट्राफिक प्रहरी निरीक्षक सिताराम हाछेथुले दुर्घटना कम गर्न सडकमा ट्राफिक पूर्वाधार निर्माण र ट्राफिक व्यवस्थापनका लागि सरकारलाई सुझाव दिनुभएको छ–

१. यातायात व्यवस्थापनमा सहज तुल्याउन काठमाण्डौ उपत्यकाका ८७ वटा चोकमा ट्राफिक बत्तीको व्यवस्था गर्न आवश्यक छ । ट्राफिक बत्तीले उपत्यकाको ट्राफिक व्यवस्थापनको समस्यालाई समाधान गर्न सक्छ ।

२. सडक डिभाइडर राख्दा फराकिलो सडकमा पैदल यात्रुलाई बाटो काट्न सजिलो हुन्छ, यसले दुर्घटना घटाउँछ ।

३. आकाशे पुल र जेब्रा क्रसको सङ्ख्या बढाउनुपर्छ ।

४. सडक बत्ती राख्न जरुरी छ ।

५. सरकारले इन्धन कर बापत लिएको रकमको सानो अंश मात्र दुर्घटना कम गर्नको लागि छुट्याइने हो भने दुर्घटनाबाट हुने मृत्युदर र अङ्गभङ्ग हुने दरमा कमी ल्याउन सकिन्छ ।

६.सडकमा गाडीको चाप बढेका कारण बाटो फराकिलो पार्ने काम भइरहेको छ । तर फराकिलो सडकमा गाडी पार्किङ गर्ने प्रवृत्तिले समस्या निम्त्याएको छ । त्यसैले सडकमा पार्किङ खारेज नै गर्नुपर्छ ।

७. खोला किनारमा ‘करिडोर’ निर्माण गर्ने र सहायक बाटो बिस्तार गर्नुपर्छ, जसले गर्दा उपत्यकाको ट्राफिक व्यवस्थापनमा धेरै सहज हुन्छ ।

८. दुर्घटना न्यूनीकरण र ट्राफिक व्यवस्थापन वर्षका रुपमा हरेक वर्ष ट्राफिक शिक्षा दिने र विशेष कार्यक्रम गर्न जरुरी छ ।

९. सडकमा पर्याप्त मात्रामा बस बिसौनी बनाइएको छैन । बस बिसौनी भएका ठाउँमा पनि सडकबाट पाँच फिट बाहिर निकालेर बनाउनुपर्नेमा त्यसो गरिएको छैन । जसले सवारी जाम गराउने हुँदा बस बिसौनी बनाउन सरकारले ध्यान दिनै पर्छ ।

१०. सरकारले यातायात क्षेत्र सुधारका लागि राम्रो र प्रभावकारी काम गर्ने व्यक्तिलाई उचित मूल्याङ्कन गरी राम्रो काम गर्नेलाई प्रोत्साहन गर्न पुरस्कारको व्यवस्था गर्नुपर्छ ।

(हाछेथु ट्राफिक प्रहरीका अवकाश प्राप्त निरीक्षक हुनुहुन्छ)

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्