नेपाली समर्थकलाई मेस्सीको सम्बोधन !

 असार १६, २०७५ शनिबार ८:१२:३१ | मिलन तिमिल्सिना
unn.prixa.net

विश्वकप सुरु हुनु पहिलेदेखि नै मेस्सी मेस्सी भनेर उफ्रिरहेका मेरा नेपाली समर्थकहरु । तपाईंहरुको हराउनै लागेको चुरीफुरी र फुरफुर फेरि ब्युँतिएकोमा बधाई छ ।

तपाईँहरुकै करकाप र जोडबलले जारी विश्वकपमा मुश्किलले एउटा गोल हानेर इज्जत राख्न र तपाईंहरुको निराशा हटाउन सफल भएको छु । आशा छ, तपाईँहरु फेरि मेस्सी मेस्सी भनेर अझै बुरुकबुरुक गरिरहनुभएको छ ।

तपाईँहरुले मबाट धेरै नै आशा गर्नुभयो । भनेजस्तो हुन सक्ने, जतिखेर पनि गोल मात्रै गर्न सक्ने खुबी भएको भए त्यो आशा पनि स्वभाविक नै हो । तर मैदान सधैँ उस्तै हुँदैन, कहिले गोल हुँदैन कि भनेर हान्दा पनि भकुण्डो जालीमा छिर्छ, कहिले गोल गर्छु भनेर हान्दा पनि विपक्षीको गोलकिपरले छेक्छ । 

यसपल्ट यस्तै भयो । सुरुका दुई खेलमा जादू देखाउन सकिन । त्यसो त म जादूगर पनि होइन नि । मेस्सीले जादू देखाएनन् भनेर तपाईंहरु आत्तिनुभयो । जर्सी च्यातेर फाल्नुभयो । कतिपयले टिम नै फेर्नुभयो । मलाई गाली गर्नुभयो । तपाईँका केही नेताले समेत मलाई खिसीटिउरी गरे । 

ओलीजीले समर्थन फिर्ता लिएको घोषणा गर्नुभयो । मलाई कांग्रेसको देउवासँग तुलना गर्नुभयो ।  मेस्सी र मेरो हालत उस्तै भयो भनेर देउवाजी मख्ख पर्नुभयो । प्रचण्डजीले रोनाल्डोसँग एकता गर्न सल्लाह दिनुभयो । भट्टराईजीले नयाँशक्तिमा आउन भन्नुभयो । यी सबै ममाथि गरिएका अविश्वास र अपमान हुन् ।

ओलीले मेस्सीको साथ छोडे, देउवाको दह्रो समर्थन !

सुरुवातका दुई खेल गाह्रो भएकै हो । गोल गर्न नसकेकै हो । सधैँ  आफूले भनेजस्तो नहुनेरैछ । आइसल्याण्डविरुद्धको पेनाल्टीमा त गोल गर्छु जस्तै लागेको थियो । तर उताका गोलकिपरलाई छलाउन सकिएन, उनले समाइदिए । गोलकिपरलाई छलाउन सकेको भए त गोल भैहाल्थ्यो नि । पेनाल्टीमा सधैँ गोल हान्न सकिँदैन भन्ने त रोनाल्डोजीले पनि पुष्टि गरेर देखाइदिसक्नुभएको छ ।

आइसल्याण्डले भन्दा बढ्दा क्रोएसियाले सातो खुवाएकै हो । त्यो खेलले त हामीलाई भेन्टिलेटरमा पुर्‍यायो । भेन्टिलेटरमा पुगेपछि पुनर्जीवन पाइन्छ भन्ने आश कमैलाई हुन्छ । हामीलाई त्यस्तै भयो, तपाईँहरुलाई पनि भयो । तर कहिलेकाहीँ चमत्कार हुँदो रहेछ । 

विश्वकपमा चारतारा जर्सी भएको इटाली छनोट चरणबाटै बाहिरियो । चारवटै तारा भएको जर्मनी समूह चरणबाट पाखा लाग्यो । नेपालमा चारतारा र विश्वकपमा चारतारा फाप्ने रहेनछ भन्ने हामीलाई पनि लाग्न थालेको छ ।

आफूलेभन्दा अरुले राम्रो खेलेपछि मरिसकेको हाम्रो आश तँग्रिएर आयो । आइसल्याण्डलाई हराएर नाइजेरियाले हामीलाई गुन लगायो । त्यही गुन लगाउने नाइजेरियालाई मुश्किलले जितेर हामी तँग्रियौं । सँगसँगै तपाईं नेपाली समर्थक तँग्रिनुभयो । बेहोस भएकाहरु जर्याकजुरुक उठ्नुभयो । मिल्काइसकेको जर्सी टिपेर लगाउनुभयो । बसिसकेको स्वर चर्काएर फेरि मेस्सी मेस्सी भनेर उफ्रन थाल्नुभयो । आफ्नै देशको झण्डा यति धेरैपटक छुनुभएको छैन होला । तर हाम्रो जर्सी पटकपटक तन्काउँदै उफ्रिरहनुभएको छ ।

साँच्चै भन्ने हो भने पछिल्लो यो खेलमा मैले आफ्नो लागि होइन, तपाईँहरुको लागि खेलेको हो । मैले यो खेल पनि झुर खेलेको भए तपाईँहरुले सडकमा विरोध प्रदर्शन गर्नुहुन्थ्यो । अर्जेन्टिनामाथिको हार फिर्ता गर भन्दै नेपाल बन्द गर्न सक्नुहुन्थ्यो । नेपाल बन्दको सबै दोष मेरो थाप्लोमा आइलाग्थ्यो । यसअघि मेरो खेल देखेर रिसाएका ओलीजी झनै रिसाउन सक्नुहुन्थ्यो । त्यसैले मैले तपाईँहरुको हितमै अन्तिमपटक यस्तो कदम चालेको हो ।

अर्को कुरा नेपालमा गएको मंसिरमा भएको चुनावी परिणाम र वर्तमान सरकारले चालेका केही अभियान सुहाउँदो क्रियाकलाप अहिलेको विश्वकपमा देखिन थालेको छ । यसपटक चुनावमा तपाईंहरुले चार तारा झण्डा भएको पार्टीलाई अघिल्लो चरणमा जान दिनुभएन । विश्वकपमा चारतारा जर्सी भएको इटाली छनोट चरणबाटै बाहिरियो । चारवटै तारा भएको जर्मनी समूह चरणबाट पाखा लाग्यो । नेपालमा चारतारा र विश्वकपमा चारतारा फाप्ने रहेनछ भन्ने हामीलाई पनि लाग्न थालेको छ ।

नेपालमै थालिएको अर्को अभियानलाई पनि विश्वकपमा लागू गर्न खोज्दैछौं । तपाईंहरुको सरकारले सिन्डिकेट हटाउने अभियान थालेको छ । तर प्रभावकारी बनाउन सकेको छैन । यो अभियानलाई हामी पनि साथ दिएर प्रभावकारी बनाउनुपर्छ भन्ने सन्देश दिन खोज्दैछौं । सधैं उही टिम र उही अनुहार अगाडि आउनुपर्छ भन्ने सोचाई त्याग्नुपर्छ । त्यसको छनक तपाईंहरुले पाइसक्नुभएको छ ।

अर्को एउटा सत्य कुरा तपाईंहरुले पनि के बुझ्नुपर्यो भने विश्वकपमा केही वर्षयता विजेता टोली अर्कोपटक समूह चरणबाट बाहिरिने परम्परा बसेको छ । यसपाली पनि यो परम्परालाई निरन्तरता दिने हाम्रो सोचाई हो । तपाईंहरुले अर्जेन्टिनाले जिते हुन्थ्यो भन्ने कामना गर्नुभएको छ । तर यसपटक जित्दा अर्कोपटक समूह चरणबाट बाहिरिनुपर्छ । त्यो बेला तपाईंहरुलाई झन् नमज्जा लाग्ने हो कि भनेर त्यो नमज्जा लाग्ने बानी अहिलेदेखि नै लागोस् भनेर म र हाम्रो टिमले सोचिरहेको छ । अबको खेल यसअघिका दुईखेल जस्तै भयो भने हाम्रो सोच पूरा हुन्छ । 

र, अत्यमा नेपाली समर्थकलाई मैले विशेष एउटा कुरा भन्नु छ । त्यो हो तपाईंहरु हामीजस्ता विदेशी टोलीको समर्थनमा चाहिनेभन्दा बढी फुरफुर र बुरुकबुरुक नगर्नुहोला । विश्वकप खेल्ने हामी, जर्सी बनाउने भारत र चीन, अनि जर्सी तन्काएर तेरो टिम यस्तो, मेरो टिम यस्तो भनेर उफ्रने चाहिँ तपाईंहरु ? 

आफ्नो देश विश्वकपमा पुगेको दिन खुशी हुनुहोस् । आफ्नै देशको जर्सी लगाएर उफ्रने दिनको कामना गर्नुहोस् । आफ्नै देशको झण्डा समातेर दौडनुहोस् । हाम्रो समर्थनमा उफ्रन थाल्नुभयो भने एकदिन निराश हुनुपर्छ । एकपटक निराश भैसक्नुभएको छ ।

अहिले केही दिनको लागि मात्रै मैले खुशी दिन सफल भएको हो । तपाईं समर्थकको अनुहारमा सधैँ खुशी ल्याउन म सक्दिन । धेरै मेरो मात्रै भर पर्न थाल्नुभयो भने तपाईं सबै समर्थक डिप्रेशनको बिरामी पर्न सक्नुहुन्छ । अहिलेदेखि नै ख्याल गर्नुहोला ।   

अन्तिम अपडेट: मंसिर १३, २०८१

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

मिलन तिमिल्सिना

दुई दशकदेखि रेडियो र अनलाइन पत्रकारितामा संलग्न मिलन तिमिल्सिना समसामयिक विषयमा विश्लेषण र व्यंग्यमा दखल राख्नुहुन्छ। 

6 Comments

  • Siddha Raj Ojha

    July 2, 2018, 8:16 a.m.

    Wwaa,,!!! ekdam dammi lagyo sir, samaya sandarvik xa

  •  0 Reply

  • Janam malla

    June 30, 2018, 10:40 p.m.

    हजुर्को यो लेख धेरै राम्रो छ ।

  •  0 Reply

  • Suwas

    June 30, 2018, 3:42 p.m.

    झुर, कहिलेकाहीं वर्ल्डकप भन्दा बढी फुटबल हेर्ने गर्नुस... कुनै कुरामा कलम चलाउनु अघि त्यो आफ्नो क्षेत्र हो वा होइन, आँफुले लेखेको कुरामा आफ्नो दख्खल छ वा छैन बुझ्नुस..... अरु त के भनेर समय खेर फालम, ऐले लाई यत्तिनै

  •  0 Reply

  • Debel Thapa

    June 30, 2018, 2:59 p.m.

    Mad Writer.

  •  0 Reply

  • Sanjeev magar

    June 30, 2018, 2:15 p.m.

    Sarai ramro sajesan Messi (milan timalsena) g .

  •  0 Reply

  • Durga bahadur khadka

    June 30, 2018, 8:36 a.m.

    100% Sahi ho .aslai sabaile aatmasath garna saknu parxa .

  •  0 Reply

तपाईको प्रतिक्रिया

समाचार

लोकप्रिय

१

एनपीएलको उद्घाटन खेलकाे सबै टिकट बिक्री, ३३ लाख रुपैयाँभन्दा धेरै आम्दानी

२

युक्रेनद्वारा रुसमाथि अमेरिकी क्षेप्यास्त्र आक्रमण

३

दुर्गा प्रसाईंलाई थुनामुक्त गर्न सर्वाेच्चद्वारा अस्वीकार

४

उत्तर र दक्षिण कोरियाको सीमावर्ती क्षेत्रमा 'लाउडस्पिकर' युद्ध चर्कियो

विचार

उज्यालो टी भी

वैदेशिक रोजगारीमा जादा सुरक्षित हुने तरिका

मनोपरामर्शले बदलेको जीवन कथा

विदेशबाट श्रीमान् फर्काउने साहस बटुलेका वित्तीय कक्षा सहभागीका कथा

मेरो कथा मेरो भोगाई