‘यो वर्ष १० हजार ५० जना कोरिया जान पाउँछन् भनिएको होइन’

चैत ७, २०७५ बिहीबार १३:३२:३६ | मोहन पौडेल

काठमाण्डौं – वैदेशिक रोजगार विभाग अन्तर्गतको ईपीएस कोरिया शाखाले सन् २०१९ को कोरियन भाषा परीक्षाबाट उत्तीर्ण भएर कोरिया जान पाउने नेपालीको सङ्ख्यामा नझुक्किन आग्रह गरेको छ ।

यो वर्ष कोरियाले १० हजार ५० जना नेपाली कामदार लाने भनेर आइरहेका कुरा सत्य नभएको भन्दै ईपीएस कोरिया शाखाले यो सङ्ख्या पहिलो चरणको भाषा परीक्षाबाट उत्तीर्ण हुनेको सङ्ख्या मात्रै भएको स्पष्ट पारेको छ ।

शाखाका सूचना अधिकारी शोभाकर भण्डारीले उज्यालोलाई भन्नुभयो, ‘१० हजार ५० जना भनेको कोरिया जान पाउने सङ्ख्या होइन, यो पहिलो चरणको भाषा परीक्षाबाट उत्तीर्ण हुने सङ्ख्या मात्रै हो ।’

यसअघि भाषा परीक्षाबाट उत्तीर्णहरु जान पाउने भए पनि यो वर्षबाट भाषा परीक्षासँगै सीप परीक्षणमा पनि उत्तीर्ण हुनुपर्नेछ । सीप परीक्षणमा उत्तीर्ण नहुने व्यक्ति कोरिया जान नपाउने पनि शाखाले स्पष्ट पारेको छ ।

सीप परीक्षणमा कामसँग सम्बन्धित सीपको परीक्षण हुने भए पनि त्यस विषयको जानकारी भाषा परीषाको नतिजासँगै गराइने शाखाले जनाएको छ । सन् २००८ देखि कोरियन भाषा परीक्षामा सीप परीक्षण गरिँदै आए पनि त्यसलाई नतिजामा जोडिएको थिएन ।

सन् २०१७ र १८ मा सीप परीक्षण गरिएको थिएन । तर यो वर्षदेखि सीप परीक्षणलाई अनिवार्य गरिएको हो ।

प्रश्नको सङ्ख्या घट्यो

यस अघि २५ वटा पढेर उत्तर दिने र २५ वटा सुनेर उत्तर दिने गरी ५० वटा प्रश्न हुने गरेकोमा यो वर्ष पढ्ने र सुन्ने प्रश्नको सङ्ख्या घटाएर २०/२० वटा बनाइएको छ । परीक्षामा उत्पादनमूलक क्षेत्र तर्फ ४७ दशमलव ५ वा त्योभन्दा धेरै र कृषि तर्फ ३६ अंक ल्याउनेहरुमध्ये धेरै उच्च अंक ल्याउनेहरुबाट छनौट गरिने छ ।

यो वर्ष पहिलो चरणको भाषा परीक्षाबाट उत्पादनमूलक क्षेत्र तर्फ ७ हजार ५० र कृषि तर्फ ३ हजार परिक्षार्थी छनौट हुनेछन् । भाषा परीक्षाबाट उत्तीर्ण १० हजार ५० जनाको सीप र क्षमता परीक्षण गरिनेछ ।

त्यसमा उत्तीर्ण भएका व्यक्ति मात्रै रोजगारीका लागि कोरिया जान पाउने ईपिएस कोरिया शाखाले जनाएको छ । सीप र अनुभव परीक्षणमा सम्बन्धित कामको अनुभव, तालिम, शैक्षिक पृष्ठभूमी र प्रमाणपत्रलाई आधार मानिने शाखाले जारी गरेको सूचनामा उल्लेख छ ।

‘उदाहरणका लागि उत्पादनमूलक क्षेत्रमा जाने व्यक्तिलाई १० नम्बरको पेन्चीस ल्याउनु भन्दा उसले भाषा बुझेर त्यो ल्याउन सक्छ कि सक्दैन भनेर हेर्ने होला ।’ शाखाका सूचना अधिकारी शोभाकर भण्डारीले भन्नुभयो, ‘अनि नट बोल्ट कस्न लगाउँदा जान्दछ कि जान्दैन भनेर हेर्ने होला । उसको कामसँग सम्बन्धित यस्तै सीपको परीक्षण गरिन्छ ।’

परीक्षाको फारम भोलिदेखि खुल्ने

परीक्षाको फारम भोलि शुक्रबारदेखि खुल्ने भएको छ । शुक्रबारदेखि खुल्ने फारम चैत १७ गतेसम्म भर्न सकिने ईपिएस कोरिया शाखाले जनाएको छ । यस पटक अनलाइनबाटै भर्न सकिने व्यवस्था गरिएको परीक्षाको फारम १८ वर्षदेखि ३९ वर्षसम्मका व्यक्तिले भर्न सक्नेछन् ।

eoers.epsnepal.gov.np मा गएर अनलाइनबाटै फारम भर्न सकिनेछ । परीक्षा दिन जाँदा फारम भरेपछि परिक्षार्थीको इमेलमा आउने प्रवेशपत्रको रंगीन प्रिन्ट र सक्कल एमआरपी अनिवार्य रुपमा लानुपर्छ । २०७६ जेठ २५ र २६ गते सञ्चालन हुने परीक्षाको नतिजा असार १३ गते प्रकाशित हुनेछ ।

याे पनि पढ्नुहाेस् ।

कोरियन भाषा परीक्षाको शुल्क तिर्न बैंकमा लाइन बस्नु नपर्ने, ई सेवाबाट पनि तिर्न सकिने

‘कोरियन भाषा परीक्षाको फारम १२ हजारले मात्रै भर्न पाउने कुरा सत्य होइन’

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

मोहन पौडेल

मोहन पौडेलसँग भुटानी तथा तिब्बती शरणार्थीका विषयमा लामो समय रिर्पोटिंग गरेको अनुभव छ । उहाँ वैदेशिक रोजगारका विभिन्न पाटामा पनि कलम चलाउनु हुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्