मेक्सिकोमा पहिलो महिला राष्ट्रपतिको रूपमा क्लाउडिया शेनबाम विजयी

जेठ २१, २०८१ सोमबार १८:२५:१९ | एजेन्सी

मेक्सिकोका नागरिकले इतिहासमा पहिलो पटक राष्ट्रपतिमा महिलालाई निर्वाचित गरेका छन् । आज सकिएको मतगणनामा क्लाउडिया शेनबाम लगभग ६० प्रतिशत मतका साथ विजयी भएको बीबीसीले जनाएको छ ।

मेक्सिको सिटीका पूर्व मेयर समेत रहनुभएकी शेनबामले ५८ देखि ६० प्रतिशत मत प्राप्त गरेको देखिएको छ । निर्वाचन आयोगले अन्तिम परिणाम भने घोषणा गरेको छैन ।

अहिले निर्वाचित हुनुभएकी शेनबामले आउँदो अक्टोबरको १ तारिखदेखि कार्यभार सम्हाल्नुहुनेछ । अहिले मेक्सिकोभर उहाँका समर्थकले विजयको उत्सव मनाइरहेका खबरमा उल्लेख छ । ऊर्जा वैज्ञानिकसमेत रहनुभएकी शेनबामले मेक्सिकोका अहिलेका राष्ट्रपति लोपेज ओब्राडोरले गरेका राम्रा कामलाई निरन्तरता दिने प्रतिज्ञा गर्नुभएको छ ।

मेक्सिकोको दुई सय वर्षको प्रजातान्त्रिक इतिहासमा पहिलो महिला राष्ट्रपति बन्नु आफ्ना लागि मात्र नभई सारा मेक्सिकन महिलाका लागि गर्वको दिन भएको नवनिर्वाचित राष्ट्रपति शेनबामले बताउनुभएको छ ।

मेक्सिकोमा महिलाका लागि यो चुनावको नतिजालाई ठूलो परिवर्तनको रूपमा वर्णन गरिएको रोयटर्सले जनाएको छ । राष्ट्रपति पदमा उम्मेदवारी दिनुअघि शेनबाम मेक्सिको सिटीको पहिलो महिला मेयर हुनुहुन्थ्यो जुन देशको सबैभन्दा प्रभावशाली राजनीतिक पदहरूमध्ये एक हो । अहिलेसम्मका लगभग सबैजसो राष्ट्रपति मेक्सिको सिटीकै पूर्वमेयर रहेका छन् ।

यो चुनावका क्रममा मेक्सिकोमा फैलिएको दङ्गामा परेर अहिलेसम्म ३७ जनाको ज्यान गएको पुष्टि भएको छ । मेक्सिकोमा हिंस्रक तस्करहरूको समूहलाई नियन्त्रण गर्नु नै नवनिर्वाचित राष्ट्रपति शेनबामको मुख्य चुनौतीका रूपमा हेरिएको छ ।

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्