यसरी पक्राउ परे विप्लव समूहका २१ नेता

असोज ३०, २०७६ बिहीबार १९:५३:२१ | हेमराज शर्मा

दाङ - मुस्किलले मुग्रेठा खोलामा ६-७ घर छन् । गाउँसम्म पुग्न मोटर बाटो हुने कुरै भएन । गोरेटो बाटो हुँदै राजपुर गाउँपालिका वडा नम्बर-४ मा पर्ने मुग्रेठा खोला पुगिन्छ । याे नेपाल-भारत सीमा नाका क्षेत्र पनि हो । सुरक्षाको दृष्टिले सुरक्षित गाउँ । यही गाउँबाट नेपाल प्रहरीले नेत्रविक्रम चन्द 'विप्लव' नेतृत्वको नेपाल कम्युनिष्ट पार्टीका २१ नेतालाई पक्राउ गर्‍यो ।

मुग्रेठा गाउँमा बैठक हुनुभन्दा एक दिन अघि मात्रै नयाँ मानिसहरुको आउने क्रम सुरु भएको प्रहरी कार्यालयमा गोप्य सूचना पुग्यो । सूचनाको आधारमा प्रहरीले सादा पोशाकका प्रहरी खटायो । केन्द्रीय नेताहरु राप्ती ब्यूरो बैठकका लागि आएको पुष्टि भएपछि प्रहरीले पक्राउ गर्ने योजना बनायो ।

खुल्ला सिमानाका कारण देउखुरीको गढवा र राजपुर गाउँपालिकाको सिमाना क्षेत्रमा विप्लवका नेता कार्यकर्ताको आश्रयस्थल रहेको चर्चा चल्ने गरेको थियो ।

जिल्ला प्रहरी कार्यालय दाङ, वडा प्रहरी कार्यालय लमही र इलाका प्रहरी कार्यालय गढवाका गरी २० जना प्रहरीले बैठक बसिरहेको घर घेरा हालेर पक्राउ गरे । गाडी जाने ठाउँसम्म गाडीमा गएका प्रहरी तीन घण्टासम्म जंगलको बाटो पैदल हिँडेर मुग्रेठा पुगेका थिए ।

त्यहाँ पुग्दा बैठकस्थल वरपर विप्लवका युवाहरु सेन्ट्री बसेर सुरक्षा दिएको पत्ता लागेपछि प्रहरीले रुट परिवर्तन गरेर अर्काे बाटोबाट त्यहाँ पुग्यो र बैठक बसिरहेका नेत्रविक्रम चन्द 'विप्लव'का दाजु चन्द्रबहादुर चन्दसहितका नेताहरुलाई पक्राउ गर्न सफल भयो ।

दाङका प्रहरी प्रमुख प्रहरी उपरीक्षक (एसपी) जनक भट्टराईले उनीहरुको बारेमा शुक्रबार मात्रै सार्वजनिक गरिने बताउनुभयो । सबैलाई बिहीबार दिउँसाे नै जिल्ला प्रहरी कार्यालय दाङमा ल्याएर सोधपुछ सुरु भएको उहाँले बताउनुभयो ।

‘नागरिकता अनुसारको ठेगाना नै बताउँदैनन्’, एसपी भट्टराईले भन्नुभयो, ‘पक्राउ गरिएका सबैले उल्टासुल्टा मात्रै कुरा गर्छन्, हामी छिट्टै घटना सार्वजनिक गर्ने प्रक्रियामा छौँ l’

सम्बन्धित समाचार

बैठकस्थलमै घेरा हालेर विप्लवका दाजुसहित २१ जना पक्राउ (नामसहित)

अन्तिम अपडेट: मंसिर १८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

हेमराज शर्मा

दाङमा बसेर पत्रकारिता गर्ने हेमराज शर्मा लामो समयदेखि उज्यालोमा कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्