म प्रोफिट-मेकिङ अस्पतालमा जाँदिन, गएँ भने सरकारीमै जानेछु: पूर्व राष्ट्रपति डा. यादव

पुष २६, २०७५ बिहीबार १८:३८:३६ | हेमराज शर्मा

दाङ - गणतान्त्रिक नेपालका प्रथम राष्ट्रपति डाक्टर रामबरण यादबले आफू चिकित्सा पेशामा फर्कने इच्छा रहेको भन्दै सरकारी अस्पतालमा मात्रै जाने बताउनु भएको छ ।

बिहिबार रिपोर्टर्स क्लब दाङकाे साक्षात्कारमा उहाँले भन्नुभयो,‘मेरो एउटा सीमा छ, म प्रोफिट-मेकिङ अस्पतालमा जाँदिन,’ डा.यादवले भन्नुभयाे, ‘यदि म गएछु भने सरकारी अस्पतालमै जानेछु ।’

उहाँले काठमाडाैंमा भए बीर र टिचिङमा अनि मोफसलमा भए गृहजिल्ला जनकपुरमा जान सक्ने इच्छा जाहेर गर्नुभयो । आफू नेपाली कांग्रेसबाट प्रथम राष्ट्रपति हुने सौभाग्यसमेत मिलेको हुँदा कांग्रेसका नेताहरुले बीपी, गणेशमानका नामबाट खोलिएका अस्पतालमा जान सुझाएको भए पनि त्यहाँ जान नसक्ने उहाँले बताउनुभयो ।

आफू बीपी, गणेशमान र महेन्द्र नारायण निधिको मात्रै नभएर अन्तिम समयमा कृष्णप्रसाद भट्टराईको पनि फिजिसयन डाक्टर भएर काम गरेको स्मरण गर्दै डा.यादवले मनमोहन लगायतका नेताहरुको नाममा पनि अस्पताल खुलेको हुँदा उहाँहरुको नाम बदनाम गर्न कोही पनि लाग्न नहुने धारणा राख्नुभयो । ‘उहाँहरु सबैको लोकतन्त्र प्राप्तिमा ठूलो योगदान छ,त्यसैले उहाँहरुको सम्मान गर्नुपर्छ,’ यादवले भन्नुभयो ।

डा यादवले बर्तमान संविधान कार्यान्वयनमा चिन्ता ब्यक्त गर्नुभयो । संविधान कार्यान्वयनमा देखिएका समस्याहरु प्रती आशका गर्दै कार्यान्वयनमा चिन्ता ब्यक्त गर्नुभएको हो ।

डाक्टर यादवले भन्नुभयो, ‘म जहाँ जान्छु, संविधान कार्यान्वयनमा जोड दिँदै आएको छु । यसो गर्दा सरकारलाई केही न केही दबाब पुग्नेछ भन्ने आशा लिएको छु,’ पूर्व राष्ट्रपति यादवले भन्नुभयो ।

साक्षात्कार कार्यक्रममा उहाँले संविधान अक्षरश: कार्यान्वयन हुनुपर्ने धारणा राख्दै मुलुकलाई सही ढङ्गबाट सञ्चालन गर्न पनि संविधान कार्यान्वयन हुनुपर्छ भन्ने आम जनताको आशा र भरोसा जस्तै आफ्नाे पनि त्यही चाहना भएकाे प्रष्ट पार्नुभयो ।

कार्यक्रममा डा. यादवले आफ्नो रुची र चाहना वातावरणीय पक्षमा काम गर्ने रहेकाे पनि रहेको बताउनुभयो । हिमाल, पहाड र तराईको वनजंगल तथा वातावरण कसरी जोगाउन सकिन्छ भन्ने बारेमा आफूलाई बढी चिन्ता लाग्ने गरेको उहाँले बताउनुभयो ।

उहाँले समाजको सद्भावलाई कसरी जोड्ने, क्षेत्रीय र जातीय सद्भाव कसरी दिगो राख्ने तथा राष्ट्रिय एकतालाई कसरी बलियो बनाउने भन्ने चिन्ता रहेको पनि बताउनुभयो ।

अन्तिम अपडेट: मंसिर १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

हेमराज शर्मा

दाङमा बसेर पत्रकारिता गर्ने हेमराज शर्मा लामो समयदेखि उज्यालोमा कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्