मध्यपहाडी लाेकमार्ग : पोखराको लामाचौर, बाटुलेचौर क्षेत्रका स्थानीय आन्दोलनमा

चैत २, २०७९ बिहीबार १२:२६:५४ | सागर राज तिमिल्सिना

कास्की – राष्ट्रिय गौरवको आयाेजना पुष्पलाल (मध्यपहाडी) लाेकमार्गअन्तर्गत पोखराको भैँसे–ज्याम्दुदेखि जौबारी–याम्दीपुलसम्मको सडककाे काम स्थानीयको विरोधपछि राेकिएकाे छ । पोखरा महानगरपालिका वडा नम्बर १६ का स्थानीयले आफ्नो घरबार नै उठ्ने गरी जानकारी नदिई राजमार्ग बनाउन रेखाङ्कन गरिएको भन्दै आन्दोलन सुरु गरेका छन् ।

स्थानीयको आन्दोलनपछि मध्यपहाडी लाेकमार्ग योजना कार्यालयल कुश्माले वडा कार्यालय १६ लाई पत्रचार गरी विवाद समाधान भएपछि मात्र सडक निर्माणकाे काम अघि बढ्ने व्यहोराको पत्र पठाएर बुधवारदेखि काम रोकिएको हो ।

मध्यपहाडी लाेकमार्गकाे भैँसे–ज्याम्दु–मेलबोट–पानीघाट–आन्टीघर–अर्मलाकोट–कालीखोलापुल–अमलाबिसौनी–लामाचौर–जौबारी–याम्दीपुलसम्मको सडक निर्माणका लागि ठेक्का व्यवस्थापन भएपछि स्थानीयले आन्दाेलन सुरु गरेका हुन् । स्थानीयले पोखरा १६ को वडा कार्यालयमा बुधवार दुई घण्टा ताला लगाएर धर्ना दिएका थिए ।

राज्यले स्थानीयलाई जानकारी नदिई घरबार नै उठ्ने गरी लाेकमार्गका लागि रेखाङ्कन गरेकोले आन्दोलन गर्नुपरेको पुष्पलाल (मध्यपहाडी) लाेकमार्ग आयोजना पीडित सङ्घर्ष समिति पोखरा १६ का सचिव सन्दिप थापाले बताउनुभयाे । उहाँले पहिलो रेखाङ्कन जहाँबाट थियो त्यहीँबाटै सडक लैजानुपर्ने बताउनुभयाे ।

मध्यपहाडी लाेकमार्गअन्तर्गत पोखरा क्षेत्रमा गरिएको अघिल्लो रेखाङ्कनबाट बजार क्षेत्रका धेरै घर पर्ने भएपछि ग्रामीण क्षेत्रको विकास गर्ने उद्देश्यले रेखाङ्कन परिर्वतन गरेको पुष्पलाल राजमार्ग योजना कार्यालय कुश्माका योजना प्रमुख नारायणदत्त भण्डारीले बताउनुभयाे । सबैकाे सहमतिअनुसार नै सडकको काम अगाडि बढ्ने उहाँकाे भनाइ छ ।

पहिलो रेखाङ्कन हेम्जाको तिब्बती क्याम्पबाट जौबारी पुल–लामाचौर–बाटुलेचौर–मितरी अस्पताल–भलाम–मनिपाल पछाडि हुँदै फूलबारी–माटेपानी–काहुँखोलाको बजार भएर भैँसेमा जोडिएको थियो । २०७८ फागुन २६ गतेको मन्त्रिपरिषद्को बैठकले पुष्पलाल (मध्यपहाडी) लाेकमार्गअन्तर्गत पोखराको भैँसे–ज्याम्दुदेखि जौबारी–याम्दीपुलसम्मको सडकको रेखाङ्कन स्वीकृत गरेको थियो ।

यस खण्डको ३५ किलोमिटर सडक तीन अर्ब ४२ करोड रुपैयाँ लगानीमा बन्न लागेको आयोजनाले जनाएको छ । राजमार्ग निर्माणको ठेक्का तीन वर्षमा सक्ने गरी स्वच्छन्द एपेक्स जेबी काठमाण्डौले पाएको छ ।

अन्तिम अपडेट: मंसिर १६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सागर राज तिमिल्सिना

कास्कीमा रहेर पत्रकारिता गर्ने सागर उज्यालाेका जिल्ला सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्