तीन दिनको लगातार बिदाले राहदानी विभागमा झनै भिड

माघ ४, २०७९ बुधबार १३:१५:६ | वैद्यनाथ पाैडेल

प्रधानमन्त्री र गृहमन्त्रीले पासपोर्ट लिन लामो लाइन बस्नुपर्ने झण्झट हटाउने भने पनि काठमाण्डौको राहदानी विभागमा पहिलेभन्दा झन् भिड थपिएको छ । गएको पुष १७ गतेदेखि विभागको सर्भरमा देखिएको समस्या समाधान हुन झण्डै एक हप्ता लाग्यो । पुष २४ मा सर्भर बनेपछि दुई दिन काम भयो । पुष २५ र २६ मा राहदानी वितरणको काम भएपछि पुष २७ मा राष्ट्रिय एकता दिवसको छुट्टी भयो । फेरि पुष २८ र २९ गते काम भएपछि पुष ३० गते शनिवार र भोलिपल्ट आइतवार माघे संक्रान्तिको पूर्व निर्धारित छुट्टी थियो । सोमवार फेरि विमान दुर्घटनाको शोक बिदा थपिएपछि राहदानी विभाग एकै पटक मङ्गलवार मात्र खुल्यो ।

मङ्गलवार कार्यालय खुल्दा बाटो छिचोल्नै नसक्ने गरी सेवाग्राहीको भिड लाग्यो । अरु सामान्य बेलामा एउटा मात्र लामो लाइन हुने गरेको विभागमा मङ्गलवार तीन वटा लाइन थिए । तर लाइन नसर्दा सेवाग्राही निराश भए । यस्तै निराशा र मलिन अनुहार बनाएर लाइनमा उभिरहनुभएको थियो, कीर्तिपुर पांगाकी सुष्मा योञ्जन । उहाँ वैदेशिक रोजगारमा जानका लागि राहदानी बनाउन आउनु भएको हो ।

योञ्जनलाई तीन दिनको बिदापछि विभागमा अत्यधिक भिड हुन्छ भन्ने नलागेको होइन । तर, छिटो राहदानी लिएर वैदेशिक रोजगारीमा जानुपर्ने बाध्यताका कारण उहाँ बुझेरै भए पनि भिडमा उभिनुभएको हो ।

‘अरु बेलामा त खुट्टा टेक्ने ठाउँ नहुने यो पासपोर्टको अफिसमा आज तीन दिनको बिदापछि झन कति भिड होला भन्ने थाहा नभएको होइन । तर, थाहा पाए पनि लाइन लाग्न आउनै पर्यो । बाध्यता छ । नत्र यो भिडमा लाइन लाग्न कोही रहरले किन आउँथे होलान् र’ उहाँले भन्नुभयो । योञ्जनले भनेजस्तै धेरैजसो वैदेशिक रोजगारीमा छिटोभन्दा छिटो जानका लागि राहदानी लिन लाइनमा उभिरहेका थिए ।

पर्वतका किरण कार्कीले राहदानी बनाउन खोजेको धेरै समय भैसक्यो । यसका लागि उहाँ आफ्नो जिल्ला प्रशासन कार्यालयमा पनि जानु भएको हो । तर, त्यहाँ राहदानी बन्न करिब एक महिना लाग्ने भनेपछि उहाँ छिटो हुन्छ भनेर काठमाण्डौ आउनु भएको हो । उहाँलाई अरु सामान्य बेलामा काठमाण्डौको राहदानी विभागको भिडका बारेमा थाहा नभएको पनि होइन । र, लगातारको तीन दिनको बन्दपछि खुलेको कार्यालयमा झन भिड हुन्छ भन्ने पनि लागेकै थियो । तर, यो भिड उहाँले अनुमान गरेभन्दा अत्यधिक थियो ।

उहाँ भन्नुहुन्छ, ‘काठमाण्डौको पासपोर्टको भिडका बारेमा थाहा नभएको त होइन । तर, जिल्लामा जाँदा एक महिना लाग्छ भनेपछि यहाँ आएको हो । यहाँ तीन दिन बिदापछि खुल्दा भिड धेरै हुन्छ भन्ने नलागेको होइन । तर, यति धेरै भिड होला भन्ने अनुमान चाहिँ थिएन ।’

बिहानदेखि नै लाइन बसे पनि उहाँले फर्म बुझाउन भने पाउनु भएन । अत्यधिक भिड भएका कारण विभागले दुई बजेपछि लाइनमा लागेका सेवाग्राहीलाई भित्र पहिले नै अत्यधिक भिड भएका कारण उहाँ जस्ता फोटो खिचाउन लाइनमा बसेकाहरुलाई भोलि बिहान आउन भनेर माइकिङ गरिरहेको थियो ।

तीन दिनको बिदापछिको भिड धेरै हुन्छ भन्ने विभागलाई पनि अनुमान थियो । यसका लागि विभाग तथा कर्मचारी तयार नै रहेको बताउनुहुन्छ प्रवक्ता दुरपदा सापकोटा । उहाँ भन्नुहुन्छ, ‘हामीले सोमवार अत्यावश्यक सेवा दिने भनेर कार्यालय खोलेका थियौँ । तर, सेवाग्राहीसमक्ष सूचना नपुगेका कारण हुनसक्छ उहाँहरु आउनु भएन । हिजो त यहाँ कुम्भ मेला नै थियो ।’ आज बुधवार हिजोजत्तिकै भिड नभए पनि लाइन लामो छ ।

सापकोटाका अनुसार सरकारले अत्यावश्यक सेवामा भिड कम गर्ने निर्णयपछि विभागले तीन÷चार वटा अनौपचारिक कार्ययोजना बनाएको छ । तर, यीमध्ये कुन लागू गर्ने र कसरी गर्ने भन्ने छलफलमा छ विभाग ।

प्रवक्ता सापकोटा भन्नुहुन्छ ‘हामी उत्तम विकल्पको खोजीमा छौँ । तर, यही भन्ने भइसकेको छैन । कतै हामीले भनेको उत्तम विकल्पबाट पनि ब्याक हुनुपरेको खण्डमा त्यसले नराम्रो सन्देश जाने हुँदा हामी छलफलमै छौँ ।’

७७ वटा जिल्ला प्रशासन कार्यालय र १७ वटा इलाका प्रशासन कार्यालयबाट सहज रुपमा राहदानी वितरण गर्ने हो भने विभागमा अहिलेजस्तो भिड हुँदैन । विभागले टोकन प्रणाली लागू गर्ने सोच पनि बनाएको छ । यस्तै कामको अवधि बढाएर बिहानैदेखि राहदानी वितरण थाल्ने विकल्पबारे पनि विभागले योजना बनाइरहेको छ ।

विभागकी प्रवक्ता सापकोटा भन्नुहुन्छ, ‘अहिले दुई/तीन वटा विकल्पका बारेमा हामीले छलफल गरिरहेका छौँ । पहिलो भनेको टोकन सिस्टम । अर्को भनेको सबै फर्म ओपन गरेर दुई/तीन महिनामा पासपोर्ट दिने । अनि अर्को भनेको कामको सिफ्ट बढाउने ।’

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

वैद्यनाथ पाैडेल

वैद्यनाथ पाैडेल उज्यालाे सहकर्मी हुनुहुन्छ ।

1 Comments

Manoj Kumar Karki
Jan. 18, 2023, 7:27 p.m.
यो सहि हो । म पनि लाइनमा थिए । यी लामो थियो । सरकारले कुरामात्र गरेर हुन्न । अरु परदेश मा पनि छिटोछिटो passport बनाउने ब्यबस्था तुरुन्त मिलाउनु पर्नेछ । कर्मचारी ले र प्रहरीले राम्रो काम गरेको छ । यो सबै सरकार को गल्ती हो ।
0 Reply

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

तीन दिनको लगातार बिदाले राहदानी विभागमा झनै भिड

1 Comments

Manoj Kumar Karki

तपाईको प्रतिक्रिया

तपाईको प्रतिक्रिया