चन्द्रबहादुर : जुन कार्यालयमा सहयोगी भएर काम गरे त्यही वडाकाे वडाअध्यक्ष

जेठ ६, २०७९ शुक्रबार ९:५८:३६ | हेमराज शर्मा

दाङ - चन्द्रबहादुर गुरुङ झन्डै पाँच वर्ष दाङ देउखुरीको राप्ती गाउँपालिका वडा नम्बर ८ को कार्यालय सहयोगी पदमा कार्यरत हुनुभयो ।

२०७४ को पालिका चुनावमा गोकर्णबहादुर राना मगर वडा अध्यक्षमा निर्वाचित भएपछि चन्द्रबहादुर गुरुङ कार्यालय सहयोगी पदमा नियुक्त भएर काम थाल्नु भएको थियो । कार्यालय सहयोगीको पदबाट राजीनामा दिएर वडा अध्यक्षको निर्वाचनमा होमिनु भएका चन्द्रबहादुर कार्यालय सहयोगी भएर काम गरेको कार्यालयको वडा अध्यक्ष बन्नु भएको छ ।

नेकपा एमालेले उहाँलाई वडा अध्यक्षको उम्मेदवार बनाएको थियो । जुन कार्यालयमा कार्यालय सहयोगी भएर काम गरेका व्यक्ति त्यही कार्यालयको अध्यक्ष भएर सेवा गर्ने अवसर प्राप्त भएको हो ।‘करिब पाँच वर्ष कार्यालय सहयोगी भएर नजिकबाट सेवा गर्ने मौका पाएँ । मलाई पार्टीले टिकट दियो । राजीनामा दिएर म चुनावमा होमिएँ । जनताको अभिमतले आज म वडा अध्यक्षमा निर्वाचित हुन पुगेको छु’ गुरुङले भन्नुभयो, ‘जुन पाँच वर्ष मैले कार्यालय सहयोगी भएर सेवा गरें, अब वडा अध्यक्ष भएर जनताको सेवामा समय बिताउने छु ।’

कार्यालय सहयोगी पदमा रहँदा सबै काम गर्नुपर्याे । सरसफाइदेखि झाडु, पोछासम्म । यति मात्र होइन, सिफारिसका काम समेत चन्द्रबहादुरले नजिकबाट सिक्नु भएको छ । ‘कार्यालय सहयोगी भएर सबै काम गरियो । त्यसमा पनि वडा सचिवसँग नजिक रहेर सिफारिसका काम जान्ने अवसर मिलेको थियो’ उहाँले भन्नुभयो, ‘अहिले म वडा अध्यक्षमा निर्वाचित भएर जनताको सेवा गर्ने अवसर पाएको छु । उत्साहित भएर जनसेवामा समय बिताउने छु ।’ वडा अध्यक्षमा उहाँ जस्तै अन्य व्यक्तिहरु पनि चुनावमा होमिएका थिए । तर, उहाँले सबैभन्दा धेरै मत प्राप्त गर्नुभयो । त्यो जनमतले कार्यालय सहयोगीको कुर्सीदेखि वडा अध्यक्षको कुर्सीसम्म पुर्याएको छ ।

नेपाली कांग्रेसका प्रभाकरदेव चौधरीलाई १ सय ३४ मतले पछि पार्दै चन्द्रबहादुर वडा अध्यक्षमा निर्वाचित हुनु भएको हो । चन्द्रबहादुरले ९ सय ५० मत प्राप्त गर्नुभयो । नेपाली कांग्रेसका वडा अध्यक्ष उम्मेदवार प्रभाकरदेव चौधरीले ८ सय १६, नेकपा माओवादीका रामचन्द्र चौधरीले २ सय ६, एकीकृत समाजवादीका विष्णु गुरुङले ९८, मङ्गोल नेशनल अर्गनाइजेसनका मोतिलाल चौधरीले ७०, राप्रपाका यदुवंशी चौधरीले ६१ मत प्राप्त गर्नु भएको थियो ।

चन्द्रबहादुर आफू मात्रै निर्वाचित हुनुभएन उहाँको सिङ्गो टिम नै निर्वाचित भयाे । सदस्यमा आत्मराम पौडेल, चुमानसिंह खत्री क्षेत्री, महिला सदस्यमा पार्वती सुवेदी, दलित महिला सदस्यमा रञ्जना सुनाम निर्वाचित हुनु भएको छ । ‘महिला, बालबालिका, दलित, ज्येष्ठ नागरिक, आदिवासी जनजाति सबैलाई समान व्यवहार गर्नुपर्ने मुख्य सिकाइ रह्यो । अझ सबैको साझा भएर सेवा दिने प्रयत्न गर्नेछु’ उहाँले भन्नुभयो, ‘सबैलाई समान अवसर प्रदान गर्ने कुरामा मेरो ध्यान जाने छ ।’

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

हेमराज शर्मा

दाङमा बसेर पत्रकारिता गर्ने हेमराज शर्मा लामो समयदेखि उज्यालोमा कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्