बजार अभावका कारण बिक्दैन दूध, दुहुना भैँसी नै बेच्छन् किसान

माघ ७, २०७७ बुधबार १३:२९:५ | श्यामशितल परियार

लमजुङ – लमजुङको दोर्दी गाउँपालिका–१, भारते सिरुबारीका कृष्णराज अधिकारी भैँसीपालक किसान हुनुहुन्छ । विगतमा निर्वाहमुखी ढंगले भैँसी पाल्दै आउनुभएका अधिकारीले २०७५ सालबाट ‘सान्दारी भैँसी फर्म’ दर्ता गरी व्यावसायिक रुपमा भैँसी पाल्दै आउनुभएको हो ।

सुरुमा ३ वटा भैँसीबाट व्यावसायिक भैँसीपालन सुरु गर्नुभएका अधिकारीको फर्ममा हाल ८ वटा भैँसी पालिएका छन् । ‘भैँसीपालन व्यवसायबाट राम्रो कमाइ हुने सम्भावना देखेर भैँसीपालन व्यवसाय सुरु गरेको हुँ,’ उहाँले भन्नुभयो ।

सुरुमा एक लाखको लगानीमा सुरु भएको उहाँको फर्ममा अहिले १० लाख बढीको लगानी भइसकेको छ । सुरुवातका चरण भएकाले अहिले वार्षिक डेढ–दुई लाख हाराहारीमा आम्दानी हुँदै आएको उहाँले बताउनुभयो । बजार अभावका कारण उत्पादित दूध बिक्री नहुने भएकाले फर्मबाट दुहुना भैँसी नै बिक्री गर्ने गरेको उहाँले बताउनुभयो । दुहुना, लैना भैँसी ८० हजार देखी १ लाखसम्ममा बिक्री हुँदै आएको उहाँले बताउनुभयो ।
‘उत्पादित दूध बिक्री हुन सकेमा नियमित आम्दानी हुन्छ । तर स्थानीय स्तरमा बजार अभावले दूध बिक्री हुन सकिरहेको छैन,’ उहाँले भन्नुभयो, ‘त्यसैले लैना भैँसी उत्पादन गरी बिक्री गर्दै आएका छौँ ।’

गोठ निर्माण, पानीको व्यवस्थापनका साथै चरनको व्यवस्थापन गर्दै बिस्तारै भैँसीपालन व्यवसाय विस्तार गर्दै लैजाने उहाँको सोच छ । ‘१५ वटासम्म भैँसी पाल्ने सोच छ,’ उहाँले भन्नुभयो, ‘त्यसका लागि आवश्यक पूर्वाधार निर्माणमा जुटिरहेको छु ।’

यस्तै, दोर्दी गाउँपालिका–३, केराबारीकै राजीव श्रेष्ठले पनि १५ वटा भैँसी पाल्नुभएको छ । ‘गाउँघरमै उद्यम गर्नुपर्छ’ भन्दै उहाँले स्वदेशमै बसी व्यवसायिक रुपमा भैँसीपालन गर्दै आउनुभएको छ ।

उहाँले पनि दुहुना, लैना भैँसी बिक्री गर्दै आउनुभएको छ । उहाँहरुझैँ पछिल्ला समय दोर्दी गाउँपालिकाका किसानले फर्म दर्ता भैँसी पाल्दै आएका पशुपंक्षी शाखा, दोर्दी गाउँपालिकाका प्रमुख शंकर पन्थीले बताउनुभयो ।

‘फर्म दर्ता गरी व्यवसायिक रुपमा भैँसी पाल्नुका साथै घुम्ती गोठमा पनि किसानहरुले भैँसी पाल्दै आएका छन्,’ उहाँले भन्नुभयो ।

उहाँका अनुसार उत्पादित दूध लमजुङको सिउँडीबार, भोटेओडारसम्म पुर्याउन सके उत्पादित दूधले बजार र मूल्य पाउन सक्छ ।

तर बजारी क्षेत्र टाढा रहनुका साथै श्रोत–साधनको अभावले पनि ग्रामीण क्षेत्रका किसानले उत्पादित दूध बजारसम्म पुर्याउन नसकिरहेको उहाँले बताउनुभयो ।

‘स्थानीय स्तरमा व्यवस्थित बजारको अभाव छ । श्रोत–साधनको कमीले किसानले उत्पादित दूध अन्य बजारी क्षेत्रसम्म पुर्याउन सकिरहेका छैनन्,’ उहाँले भन्नुभयो, ‘त्यसैले यहाँका अधिकांश व्यवसायिक भैँसीपालक किसानहरुले दूध बिक्रीभन्दा पनि दुहुना, लैना भैँसीका साथै पाडापाडी नै बेच्दै आएका छन् ।’

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्