कोरियाबाट नेपाली भन्छन् – भाग्यमा जे छ, त्यो भोग्नुको विकल्प छैन

फागुन १९, २०७६ सोमबार १२:९:४० | उज्यालो सहकर्मी

भोजराज घोडासैनी, सुर्खेत (हाल–छङ्जु, दक्षिण कोरिया)

दक्षिण कोरियामा अहिले कोरोनाको कहर छ । तर हामी काम गर्नेले नियमित कामका लागि निस्किनै पर्छ । यो नै एउटा मजदुरको बाध्यता र दैनिकी हो ।

मिडियामा कोरोनाबारे विभिन्न समाचारहरु आइरहेका छन् । यस्ता डरलाग्दा समाचारले त मनमा सन्नाटा छाउँछ नै, तर के गर्ने ? झन् विश्व नै त्रसित भएको बेला हामी कसरी नआत्तिनु ? तर पनि आफ्नो काम गर्नै पर्‍यो ।

यो संकटको बेला नेपालमा आफू हुर्किएको माटो, सँगै खेलेका साथीभाइ र रमाएका पाटीपौवा सम्झेर यहाँ बसेको छु । जीवन अतितमा मात्रै गर्व गर्ने कुरा रहेछ भन्ने बल्ल बुझेँ । मन आत्तिन्छ । तर आत्तिएर के गर्नु ? भाग्यमा जे छ त्यो भोग्नुको विकल्प पनि त छैन ।

हामी कोरियामा काम गर्नेहरु निकै व्यस्त हुन्छौँ । विश्व कता गइरहेको छ, सरकारले कस्तो नीति ल्यायो, समाजमा के भयो भन्ने विषयमा सोच्ने, विचार गर्ने फुर्सद हँुदैन । मसँगै कम्पनीमा काम गर्ने कतिपय कोरियाली नागरिकलाई उसैका देशका कतिपय घटना मैले सुनाएको छु । सुनेर उनीहरु ‘ए हो र !,’ भन्दै अचम्म मान्छन् । उनीहरुले यस्ता कुरालाई वास्ता गर्दैनन् ।

उनीहरुलाई लाग्छ, कोरोनाको डर मानेर उनीहरुले काम गर्न छाडे भने कम्पनी घाटामा जान्छ र कम्पनी घाटामा जानु भनेको उनीहरुलाई नै नोक्सानी हुनु हो ।
उनीहरु भन्छन्, ‘काम कम भयो भने साहुलाई आम्दानी हुन्न, साहुलाई आम्दानी भएन भने हामीलाई त्यसले प्रत्यक्ष असर गर्छ ।’

आफ्नै देशमा मजदुरको मजबुरी यस्तो हुन्छ भने अर्काको देशमा गएपछि के हुन्छ होला ? जस्तोसुकै भइपरी नै किन नआओस्, जस्तो महामारी नै किन नपरोस् तर बाँच्नको लागि मजदुरले कामकै चिन्ता गर्छन् । कोरियामा रहेका हामी नेपालीहरुले पनि कामकै चिन्ता गरिरहेका छौँ, परिवारको खुसीको लागि र आफ्नो भविष्यको लागि ।

अर्काको देशमा रहेका हामी मजदुरका अनेक समस्या छन् । भाषाको, परिवारसँग बिछोडको, काम गर्ने ज्ञान÷सीपको, आफ्नो पहिचानको आदि इत्यादि । काम गर्ने तरिका हाम्रो अर्को प्रमुख समस्या हो ।

कोरोनाको त्रास र चिन्ता त सबै काम सकेर कोठामा एक्लो हुँदा मात्रै हो । सामाजिक सञ्जाल खोलेर समाचार पढ्दा मात्रै हो । फुर्सद पाउँदा सोच्न, चिन्ता गर्न, बुझ्न र जान्न मन लाग्छ विशेष गरी आइतबारको दिन । नत्र त १०÷१२ घण्टा दैनिक काममै बित्छ । त्यसपछि थकित शरीरले अरु कुरा सोच्नुभन्दा निन्द्रा नै खोज्छ ।

चीनबाट सुरु भएको कोरोनाले कोरियामा निकै असर गरिसक्यो । रोकथामका उपाय पनि कच्चा साबित भइसक्यो । यसको असर कोरियामा रहेका नेपालीमाझ प्रत्यक्ष पर्‍यो । जसले कतिपय नेपाली कार्यरत कम्पनी बन्द हुने अवस्थामा पुगेका छन् । कोरियाका लगभग सबै सहरमा नेपालीहरुको प्रत्यक्ष उपस्थिति छ । कोरोनाको भयावह प्रकोप पनि चारैतिर बढ्दै छ ।

कतिपय कोरियाली सहकर्मीमा यसको सङ्क्रमण भइसक्यो । कोरिया सरकारले केही ठाउँमा स्वास्थ्य संकटकालको घोषणासम्म गरिसक्यो । यस्तो कठोर परिस्थिति हुँदा पनि हामीलाई पशुपतिनाथको कृपाले कोरोनाले छुन सकेको छैन । हे पशुपतिनाथ ! तेरो कृपा हाम्रो शिरबाट कहिल्यै नहटोस् ।

अन्तिम अपडेट: मंसिर १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्