मनकामना मन्दिरको जीर्णोद्धार कार्य सकियो

फागुन २३, २०७५ बिहीबार १७:४९:१४ | किरण लोहनी

गोरखा – राष्ट्रपति विद्यादेवी भण्डारीले गोरखाको मनकामना मन्दिर जीर्णोद्धार कार्यको समापन गर्नुभएको छ ।

आज मन्दिरमा विशेष पूजाआजासहित उहाँले जीर्णोद्धारको कामको समापन गर्नुभएको हो । राष्ट्रपति भण्डारीले मनकामना मन्दिर जीर्णोद्धारका क्रममा सरकार र स्थानीय बासिन्दाबीच भएको सहकार्य उदाहरणीय रहेको बताउनुभयो ।

मनकामना मन्दिर जीर्णोद्धारका क्रममा पुरातत्व विभागले ४ करोड रुपैयाँ विनियोजन गरेको थियो भने भक्तजनहरुबाट झण्डै १२ करोड रुपैयाँ संकलन गरिएको थियो । सरकार र नागरिकबीच सहकार्य भए विकासका कामहरु सहज रुपमा गर्न सकिन्छ भन्ने उदाहरण मनकामना मन्दिर जीर्णोद्धारले देखाएको उहाँको भनाइ छ ।

राष्ट्रपति भण्डारीले मन्दिर जीर्णोद्धारमा आर्थिक सहयोग गर्ने दाताहरुलाई सम्मान पनि गर्नुभयो । नेपाली सेनाको हेलिकप्टरमा दिउँसो साढे १ बजे मनकामना आइपुग्नुभएकी राष्ट्रपतिले मन्दिरमा पूजाआजा पनि गर्नुभएको थियो । जीर्णोद्धार समापन कार्यक्रमका वक्ताहरुले मनकामना क्षेत्रलाई विश्व सम्पदा सूचीमा राख्न पहल गर्नुपर्ने बताएका छन् ।

शहीद लखन गाउँपालिकाका अध्यक्ष रमेश थापामगरले गाउँ कार्यपालिकाको बैठकले विश्व सम्पदा सूचीमा राख्न पहल गर्ने निर्णय गरिसकेको भन्दै त्यसका लागि सहयोग गर्न राष्ट्रपति भण्डारीलाई आग्रह गर्नुभयो ।

गोरखा निर्वाचन क्षेत्र नम्बर १ का सांसद हरिराज अधिकारीले मनकामना मन्दिरसँगै आसपासका अन्य धार्मिक स्थललाई समेट्ने गरी गुरुयोजना बनाउनुपर्ने बताउनुभयो ।

पुरातत्व विभागका कायममुकायम महानिर्देशक दामोदर गौतमले मनकामना मन्दिरको ऐहितासिक र धार्मिक महत्वबारे जानकारी गराउनुभयो । मनकामना मन्दिर जीर्णोद्धारको काम २०६८ सालबाट सुरु भएको हो । जीर्णोद्धारको काम सक्न १४ करोड ६४ लाख रुपैयाँ खर्च भएको जीर्णोद्धार समितिका संयोजक नरेन्द्रबाबु श्रेष्ठले बताउनुभयो ।

राष्ट्रपति विद्यादेवी भण्डारी आउने भएपछि मनकामना मन्दिर क्षेत्रको सुरक्षामा कडाइ गरिएको थियो । राष्ट्रपतिले पूजाआजा गर्ने समयमा झण्डै एक घण्टा भक्तजनहरुलाई पूजा गर्न दिइएको थिएन । कतिपय भक्तजन आफूले ल्याएको फूलप्रसाद मन्दिर परिसरमै छोडेर फर्किएका थिए ।

अन्तिम अपडेट: मंसिर १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

किरण लोहनी

उज्यालोका गोरखा सम्वाददाता किरण लोहनी गोरखाको च्वाइस एफएममा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्