मतदानमा नागरिकको उत्साहजनक सहभागिता, भन्छन् 'दल, उम्मेदवारले हामीसँग गरेका वाचा नभुलुन्'

वैशाख ३०, २०७९ शुक्रबार १२:५४:५७ | श्यामशितल परियार

लमजुङ - पञ्चायतकालदेखि अहिलेसम्मका सबै चुनावमा भोट हालेको अनुभव छ, लमजुङ दोर्दी-१ ढोकेका ७८ वर्षका जङ्गबहादुर थापासँग । चुनावका बेला दल तथा उम्मेदवारहरुले नमस्कार गर्दै अनेकन सपना देखाउँदै नागरिकको घर आँगनमा आउने गरेको तर चुनावपछि उनीहरुले देखाएका सपना बिर्सिने गरेको तितो अनुभव पनि उहाँको मन, मष्तिष्कमा छ ।

‘हरेक चुनावमा भोट हालिएको छ । चुनावमा नमस्कार गर्दै आउँछन् । पछि जनतालाई चिन्दैनन्’ उहाँले निराशा पोख्नुभयो । चुनावका बेला नागरिकमाझ दल, उम्मेदवारहरुले गरेका वाचा नभुलिदिए हुन्थ्यो भन्ने उहाँको चाहना छ ।

‘गाउँठाउँको विकास गरुन् । हामी जस्ता वृद्धवृद्धालाई पनि हेरुन्’ पालिका चुनाव २०७९ मा कर्मोदय प्रावि मतदान केन्द्रमा भोट खसाल्नु भएका थापाले भन्नुभयो, ‘अब चुनाव जितेपछि पनि दल उम्मेदवारले हामीमाझ गरेका वाचा नभुलुन् । पार्टी नहेरि विकास गरुन् ।’

यस्तै, पञ्चायतकाल, जनमत सङ्ग्रह २०३६ र अहिलेको पालिका चुनावसम्म मतदान गरेको अनुभव छ, दोर्दी-१ बेलघारिकै टीकामान श्रेष्ठलाई पनि । तर चुनावपछि जनहितमा खासै काम हुन नसकेको उहाँको बुझाइ छ । नागरिकका खासै ठूला चाहना र सपना नरहेका बताउँदै उहाँले स्थानीय सरकारका सेवा र सुविधा नागरिकलाई सरल सहज रुपमा प्रदान गर्नुपर्नेमा उहाँको जोड छ ।

‘नागरिकका खासै ठूला सपना छैनन् । खान, लाउन देउ भनेका छैनन्’ उहाँले भन्नुभयो, ‘नागरिकलाई सरल, सहज रुपमा सेवा दिउन् । गाउँठाउँको विकास होस् ।’

जिल्लामा अहिलेसम्म शान्तिपूर्ण रुपमा मतदान भइरहेको जिल्ला निर्वाचन अधिकारी सिर्जना मिश्रले जानकारी दिनुभयो । जिल्लाका १२३ मतदान स्थल र १८२ मतदान केन्द्रमा मतदाताहरुको उत्साहजनक सहभागिता रहेको पनि उहाँले बताउनुभयो ।

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्