होप इन्टरनेशनलमा विभागको छापा, कुटनीतिक नियोगको गाडीसमेत भेटियो

मंसिर ९, २०७७ मंगलबार १४:४७:७ | उज्यालो सहकर्मी

काठमाण्डौ – पूर्व श्रम स्वीकृति नलिई कतार पठाउने भन्दै अन्तर्वार्ता लिइरहेको होप इन्टरनेशनलमा वैदेशिक रोजगार विभागले छापा मारेको छ ।

मानिस जम्मा पारेर गोप्य रुपमा अन्तर्वार्ता लिइरहेको सूचना पाएपछि विभागको टोलीले मंगलबार लाजिम्पाटस्थित होप इन्टरनेशनलमा छापा मारेको विभागका सूचना अधिकारी टीकामणि नेउपानेले जानकारी दिनुभयो । म्यानपावर हाताभित्र कुटनीतिक नियोगको गाडीसमेत भेटिएको छ । तर त्यो गाडी कुन कुटनीतिक नियोगको हो भनेर खुलिनसकेको सूचना अधिकारी नेउपानेले बताउनुभयो ।

‘विभागको टोली म्यानपावर पुगेको थाहा पाएपछि अन्तर्वार्ता लिइरहेका मानिसलाई यताउता सारेको पाइयो,’सूचना अधिकारी नेउपानेले भन्नुभयो,‘मानिस जम्मा पार्ने अन्तर्वार्ता लिने, कतारको पुलिसमा जागिर लगाइदिने भन्दै प्रलोभन देखाउने गरेको प्रारम्भिक कुरा बुझिएको छ ।’ विभागको टोली अहिले पनि विभागमै रहेको र यसबारेमा विस्तृत विवरण आउन बाँकी रहेको छ ।

विभागले सोमबार डीडी ह्युमन रिसोर्स र एसओएस म्यानपावर कम्पनीमा पनि छापा मारेर कागजपत्रसमेत जफत गरेको थियो । ती म्यानपावरमा ४ सयभन्दा बढी युवाहरु अन्तर्वार्ताका लागि आएको भेटिएको थियो । नियमअनुसार म्यानपावर कम्पनीले श्रमिकको मागपत्र विदेशस्थित दूतावासबाट प्रमाणीकरण गराएर वैदेशिक रोजगार विभागबाट पूर्व श्रमस्वीकृति लिनुपर्छ । र, तय भएको अन्तर्वार्ताको मिति विभागलाई जानकारी गराउनुपर्छ ।

अन्तरवार्तामा छनोट भएका कामदारको अन्तिम श्रम स्वीकृति विभागबाट जारी हुन्छ । तर, अहिले काठमाण्डौमा विभिन्न म्यानपावरले ठगी गर्ने गरी पूर्व स्वीकृति नभएको श्रमिकको मागपत्रमा आधारित भएर अन्तर्वार्ता चलाइरहेको पुष्टि भएको छ ।

कतारमा रहेको नेपाली दूतावासले भने गएको आइतबारदेखि मात्रै नयाँ मागपत्र प्रमाणीकरणको काम सुरु गरेको छ । कतार सरकारले नोभेम्बर १५ मा सूचना जारी गर्दै नयाँ श्रम अनुमोदन खुल्ला गरेको जानकारी गराएको हो ।

अन्तिम अपडेट: मंसिर १७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्