दम्पतीलाई बोक्साबोक्सीको आरोप लगाउने टोल सुधार समितिका अध्यक्ष पुर्पक्षका लागि कारागार चलान

पुष ३, २०७६ बिहीबार १९:५१:२२ | उषा तामाङ

दाेलखा - एक दम्पतीलाई बोक्साबोक्सीको आरोप लगाउने स्याखु टोल सुधार समितिका अध्यक्ष रत्न नारायण श्रेष्ठलाई पुर्पक्षका लागि कारागार चलान गरिएको छ ।

दोलखा जिल्ला अदालतमा बिहीबार भएको थुनछेक बहसमा दोलखाको उत्तरी विगु गाउँपालिका वडा नम्बर-५, चिलंखामा रहेकाे स्याखुका एक दम्पतीलाई बोक्साबोक्सीको आरोप लगाउँदै सामाजिक बहिष्कार गर्ने निर्णय गर्ने समितिका अध्यक्ष श्रेष्ठलाई पुर्पक्षका लागि थुनामा राख्ने आदेश भएको हो ।

त्यसैगरी घटनाका प्रतिवादीहरु छत्र बहादुर मगर, तीर्थनारायण श्रेष्ठ, हरिध्वज मगर र श्याम भन्ने बुद्धराज मगरलाई दोलखा जिल्ला अदालतले जनही ३ लाख रुपैयाँ धरौटी माग गरेकोमा रकम बुझाउन नसकेपछि उनीहरु पनि कारागार चलान भएको दोलखाका प्रहरी प्रमुख प्रहरी नायब उपरीक्षक रेवतीरमण पोखरेलले जानकारी दिनुभयो ।

त्यसैगरी त्यसै घटनाका अर्का प्रतिवादी तुलबहादुर मगरलाई साधारण तारेखमा छोडिएको छ भने घटनामा संलग्न बाँकीको खोजी कार्य भइरहेको छ ।
स्याँखु टोल सुधार समितिले ६१ वर्षीय रत्न बहादुर श्रेष्ठ र ५७ वर्षीय कृष्णमाया श्रेष्ठलाई बोक्साबोक्सीको आरोप लगाएको थियो । पीडित दम्पतीलाई आरोप मात्रै नलगाइ स्याखु टोल सुधार समितिको भेलाले गाउँबाट निकाल्ने, कथित ‘इन्द्रजाल’ किताब उपलब्ध गराउनुपर्ने र ‘झाँक्री’ले बकेकाले दोषी नै हो भनेर अपमान गरेको थियो ।

गएको मंसिर १ गते स्याखु टोल सुधार समितिका अध्यक्ष ४२ वर्षीय रत्न नारायण श्रेष्ठको अध्यक्षतामा गाउँका एक सय १३ जना सहभागी भेलाले बिहान ८ देखि बेलुकी ५ बजेसम्म बोक्साबोक्सीको आरोपसहित यातना दिएका थिए । उनीहरुले दबाब दिएर बोक्साबोक्सी भएको स्विकार्न ल्याप्चे लगाउन बाध्य पारेका थिए ।

घटना मंसिर १ गतेको भए पनि पीडितका जेठा छोरा ३५ वर्षीय भाजुराम श्रेष्ठ काठमाण्डौबाट आएर मंसीर ६ गते जाहेरी दिएका थिए ।

अन्तिम अपडेट: मंसिर २२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

उषा तामाङ

उज्यालोका दोलखा सहकर्मी उषा तामाङ कालीञ्चोक एफएममा पनि कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्