‘प्रधानमन्त्री रोजगार कार्यक्रम’ मार्फत् १ लाख ७६ हजारलाई राेजगारी, ‌औसत १३ दिनकाे काम

साउन १६, २०७६ बिहीबार १८:३४:२ | उज्यालो सहकर्मी

काठमाण्डौ – सरकारले ‘प्रधानमन्त्री रोजगार कार्यक्रममार्फत असार १५ गतेसम्म झण्डै १ लाख ७६ हजार जनाले रोजगारी पाएको दावी गरेको छ ।

श्रम, रोजगार तथा सामाजिक सुरक्षा मन्त्रालयले बिहीबार पत्रकार सम्मेलन गर्दै प्रधानमन्त्री रोजगार कार्यक्रममार्फत १ लाख ७५ हजार ९०९ जनालाई रोजगारी दिइएको जानकारी गराएको हो । यसरी राेजगारी पाउनेहरुले ‌‍‍‍‌औसत १३ दिनकाे काम पाएकाे पनि मन्त्रालयले जनाएकाे छ ।

सबै पालिकामा ६ हजार ८ सय ६४ आयोजना सञ्चालन गरी गरिबीको चपेटामा परेका झण्डै १ लाख ७६ हजार जना बेरोजगारलाई रोजगारीको अवसर दिइएको श्रम, रोजगार तथा सामाजिक सुरक्षामन्त्री गोकर्ण विष्टले बताउनु भयो । उहाँले बजेट कम भए पनि इतिहासमै पहिलो पटक सरकारले काम गरेर गरिखाने ऐतिहासिक काम सुरु गरेको भन्दै सरकारलाई त्यसमा गर्व लागेको बताउनुभयाे ।

सरकारले गएको आर्थिक वर्षका लागि 'प्रधानमन्त्री रोजगार कार्यक्रम' अन्तर्गत सबै पालिकाका लागि २ अर्ब ३६ करोड ७९ लाख ६९ हजार रुपैयाँ बजेट विनियोजन गरेको थियो । थोरै बजेटबाट पनि विभिन्न आयोजनाहरु सञ्चालन गरी सरकारले गरिब समुदायका युवालाई रोजगारी दिने काम गरेकोमा गौरवको अनुभूति गरिरहेको पनि मन्त्री विष्टको भनाइ छ ।

मन्त्री विष्टले ‘प्रधानमन्त्री रोजगार कार्यक्रम’ लागू गर्न सरकारले ८६ ओटा प्रक्रिया पूरा गरेको पनि स्मरण गराउनु भयो । उहाँले प्रधानमन्त्री रोजगार कार्यक्रम निष्पक्ष रहेको र त्यसलाई प्रभावकारी ढंगले अघि बढाउन सरकारले आवश्यक नीतिगत, कानुनी र संरचनागत आधार तयार पारिसकेको दावी गर्नुभयो ।

अन्तिम अपडेट: मंसिर १७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्