विदेशबाट सुन ल्याउँदै हुनुहुन्छ ? थाहा पाउनुहोस् भन्सार शुल्क बढ्यो

जेठ २२, २०७६ बुधबार १३:४८:५३ | उज्यालो सहकर्मी

काठमाण्डौ – विदेशबाट फर्किंदा सुन तथा सुनको गहना ल्याउने तयारीमा हुनुहुन्छ ? यदि हुनुहुन्छ भने थाहा पाइराख्नुहोस्, अब सुनको भन्सार शुल्क बढी तिर्नुपर्ने भएको छ । सरकारले तोकेको परिणाममा ल्याउन पाउने सुनको भन्सार शुल्क बढेको हो ।

आउँदो आर्थिक वर्ष २०७६/०७७ को बजेटसँगै सार्वजनिक भएको आर्थिक विधेयकमा भन्सार मूल्याँकन बढेको छ ।

कति बढ्यो त सुनको भन्सार शुल्क ?

सरकारले प्रति १० ग्राममा १ हजार रुपैयाँको दरले भन्सार महशुल बढाएको छ । विदेशमा ६ महिनाभन्दा बढी बसेका व्यक्तिलाई १०० ग्रामसम्म काँचो सुन ल्याउन दिने व्यवस्था छ ।

आर्थिक विधेयक अनुसार अबदेखि ५० ग्रामसम्मको सुन आयात गर्दा प्रति १० ग्रामको दरले ६ हजार २ सय रुपैयाँ तिनुपर्छ । यसअघि ५० ग्रामसम्म सुन ल्याउँदा प्रति १० ग्राम ५ हजार २ सय रुपैयाँ भन्सार शुल्क तिनुपर्ने व्यवस्था थियो ।

यस्तै ५० ग्रामभन्दा बढी थप ५० ग्रामसम्ममा ७ हजार २ सय रुपैयाँ प्रति १० ग्रामको दरले भन्सार शुल्क लाग्छ । पहिला यस्तो सुन ल्याउँदा प्रति १० ग्राम ६ हजार २ सय रुपैयाँ लाग्ने गरेको थियो ।

यसअघि १०० ग्राम सुन ल्याउँदा ५० ग्रामको २६ हजार रुपैयाँ तथा बाँकी ५० ग्रामको ३१ हजार रुपैयाँ भन्सार शुल्क तिनुपर्ने हुन्थ्यो । यसरी १०० ग्राम सुन ल्याउँदा ५७ हजार रुपैयाँ भन्सार शुल्क लाग्ने गरेको थियो ।

अहिलेको व्यवस्था अनुसार १०० ग्राम काँचो सुन ल्याउँदा ५० ग्राममा ३१ हजार र बाँकी ५० ग्राममा ३६ हजार रुपैयाँ भन्सार शुल्क तिनुपर्छ । यसअनुसार अब १०० ग्राम सुन ल्याउँदा ६७ हजार रुपैयाँ भन्सार शुल्क तिनुपर्छ ।

तर, ५० ग्रामसम्मको सुनको गहनामा कुनै पनि भन्सार शुल्क लाग्दैन । १०० ग्राम सुनको गहना ल्याउँदा बाँकी ५० ग्राममा प्रति १० ग्रामको दरले ७ हजार २ सय रुपैयाँ भन्सार शुल्क लाग्छ । योभन्दा बढी सुन ल्याएमा परिणामभन्दा माथिको सुन जफत हुने व्यवस्था छ ।

विदेशबाट ल्याउने अरु सामानमा लाग्ने भन्सार शुल्क बढेको छैन ।

अन्तिम अपडेट: मंसिर १७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्