म्याग्दीमा फेरि हिमपात, जनजीवन प्रभावित

फागुन १५, २०७५ बुधबार ११:३०:२४ | प्रताप बानियाँ

म्याग्दी – उच्च पहाडी जिल्ला म्याग्दीमा मङ्गलबार रातिदेखि हिमपात भएको छ । जिल्लाको उच्च क्षेत्रमा यसपटक चौथोपटक हिमपात भएको छ भने तल्लो क्षेत्रमासमेत तेस्रोपटक हिमपात भएको हो ।

म्याग्दी सदरमुकाम बेनीदेखि २६ कोष टाढा रहेको दूर्गम तथा विकट धौलागिरी गाउँपालिका–१, गूर्जामा अहिलेसम्म छैटौंपटक भारी हिमपात भएको छ । मध्य फागुनमा भएको भारी वर्षा र हिमपातका कारण स्थानीयको जनजीवन प्रभावित बनेको छ । रातिदेखि भैरहेको वर्षा र हिमपातका कारण घर बाहिर निस्कन नसकेको जगन्नाथ आधारभूत विद्यालय गाजनेका प्रधानाध्यापक निलकण्ठ शर्माले टेलिफोनमा बताउनुभयो ।

पटक–पटक परेको हिमपातका कारण स्थानीयबासीन्दालाई सास्ती भएको छ । यसपटक पनि आधा फिटसम्मै हिउँ जमेको बेनी नगरपालिका–५, डडुवाका नारायण शर्माले टेलिफोनमा जानकारी दिनुभयो । पछिल्लोपटक १२ वर्षको अन्तरालमा जिल्लाको तल्लो क्षेत्रहरुमा फेरि तेस्रोपटक हिमपात भएपछि खेतीपातीमा समेत असर परेको स्थानीयले बताएका छन् ।

२०६३ साल फागुन २ गते म्याग्दीको सदरमुकाम बेनीबजारमा हिमपात भएको थियो । त्यसपछि अहिले १२ वर्षपछि जिल्लाको तल्लो क्षेत्रमा तेस्रो पटकसम्म बाक्लो हिउँ परेको छ । गएके माघ महिनाको दोस्रो र तेस्रो साता परेको हिउँ पग्लिन नपाउँदै फेरि हिमपात भएको हो ।

जिल्लाको माथिल्लो क्षेत्रमा पर्ने गूर्जा, लुलाङ, मुदी, मल्कबाङ, कुइनेमङ्गले, टोड्के, खोप्रालेक, घोडेपानी, पुनहिल, महरेडाँडा, नागी लगायतका क्षेत्रमा भारी हिमपात भएको छ । यसैगरी बेनी नगरपालिकाको ज्यामरुककोट, भकिम्ली, पुलाचौर, डडुवा, गाजने, पात्लेखेतसहितका माथिल्लो क्षेत्रमा हिमपात भएको छ ।

जिल्लाको उच्च भेगहरुमा २ फिटभन्दा माथिसम्म हिमपात भएको छ भने तल्लो बस्तीका अधिकांश ठाउँहरुमा झण्डै १ फिटसम्म हिउँ जमेको छ । वर्षासँगै हिमपातले जिल्लाका सामुदायिक विद्यालयको पठनपाठन समेत प्रभावित भएको छ ।

अन्तिम अपडेट: मंसिर २७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रताप बानियाँ

म्याग्दीमा बसेर पत्रकारिता गर्ने प्रताप बानियाँ उज्यालोका जिल्ला सम्वाददाता हुनुहुन्छ । उहाँले मुस्ताङका खबर पनि सम्प्रेषण गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्