नेपाली धेरै भएका देशमा तत्काल दूतावास खाेल्नुपर्ने अवस्था छ : मन्त्री भण्डारी

कात्तिक २, २०८० बिहीबार १९:३७:१० | उज्यालो सहकर्मी

काठमाण्डाै – श्रम, रोजगार तथा सामाजिक सुरक्षामन्त्री शरतसिंह भण्डारीले नेपालीहरूको सङ्ख्या धेरै भएका देशहरूमा तत्काल राजदूतावास खोल्नुपर्ने अवस्था रहेको बताउनुभएको छ ।

आज बिहीवार मन्त्रालयमा पत्रकारसँग भेटघाट गर्दै मन्त्री भण्डारीले नेपालीहरूको सङ्ख्या धेरै भएका देशहरूमा सरकारको उपस्थिति अनिवार्य गर्नुपर्ने कुरा सरकारलाई महसुस भएको बताउनु भयो । उहाँले तत्काल दूतावास खोल्ने अवस्था नभएमा 'ड्राइपोस्टिङ सिस्टम' बाट भए पनि सरकारको उपस्थिति देखाउने निर्णय भएको पनि बताउनुभयो ।

मन्त्री भण्डारीले अहिले रहेका दूतावासहरूको साधन, स्रोत बढाउनका लागि पनि सरकार लागिपरेको उल्लेख गर्नुभयाे । उहाँले अप्ठेराे परेको अवस्थामा दूतावाससँग उद्धार गर्ने सामर्थ्य नरहेकाले अहिले त्यसको लागि कोषको व्यवस्था गरिएको पनि जानकारी गराउनुभयो ।

उहाँले भन्नुभयो, ‘नेपालीहरू धेरै भएका देशहरूमा तत्काल राजदूतावास खोल्नुपर्ने अवस्था छ । यदि दूतावास खोल्न सक्ने अवस्था नभएका ड्राइपोस्टिङ सिस्टमबाट सरकारकाे उपस्थिति देखाउँछाैँ भन्ने निर्णय गरेका छौँ । ड्राइपोस्टिङमा परराष्ट्र मन्त्रालयको उपसचिव तहका एक जना, श्रम मन्त्रालयका एक जना अधिकृत र तीन जना स्थानीय कर्मचारीकाे सम्पर्क कार्यालयजस्तो हुन्छ । त्यसले श्रम स्वीकृति, श्रमका विभिन्न समस्या, पासपोर्टका समस्याहरूको कुरा त्यहाँ हुन्छ ।’

मन्त्री भण्डारीले राष्ट्रिय आप्रवासन नीति बनाउनका लागि सरकारले विज्ञहरूको समूह बनाएर काम गरिरहेको पनि बताउनुभयो ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

(अनिवार्य)